Вазири мудофиаи Тоҷикистон Шералӣ Мирзо дар ҷаласаи Шӯрои вазирони мудофиаи кишварҳои узви Иттиҳоди Давлатҳои Мустақил, ки имрӯз дар шаҳри Маскав ба кор шурӯъ мекунад, ширкат меварзад.
Котиби матбуотии Вазорати мудофиаи ҶТ полковник Фаридун Маҳмадалиев ба «Азия-Плюс» дар ин робита иттилоъ дод, ки дар ҷаласаи мазкур беш аз 20 масъалаи марбут ба ҳамкориҳои мутақобилаи вазоратҳои мудофиаи кишварҳои узви ИДМ баррасӣ мешаванд.
Аз ҷараёни амалисозии консепсияи ҳамкории низомии кишварҳои узви Иттиҳод то соли 2015 натиҷагирӣ шуда, нақшаи фаъолияти муштарак дар соли 2016 тарҳрезӣ мешавад.
Аз рӯи натиҷаҳои ҷаласа қабули қарорҳои дахлдор оид ба масоили рушди низоми муттаҳидаи мудофиаи зиддиҳавоӣ, низоми алоқа, тавсеъаи ҳамкории мутақобила дар бахши поккории гуманитарии минаҳо, таълими кадрҳои ҳарбӣ, баргузор намудани тадбирҳои муштараки омодагии фаврӣ ва ҷангӣ ва ҳамчунин чорабиниҳои варзишии низомӣ дар доираи ИДМ дар назар аст.
