Сафири Тоҷикистон дар Русия Имомуддин Сатторов рӯзи 16 феврал дар маросими ифтитоҳи ҳамоиши тиҷоратии «Ҳамкории истеҳсолкунандагони Тоҷикистону Қирғизистон ва ширкатҳои русиягӣ дар соҳаи саноати сабук» иштирок ва назди ҳозирин суханронӣ намуд.
Ҳамоиши тиҷоратии мазкур дар доираи чорабинии Ярмаркаи федералии фурӯши яклухти «Текстиллегпром» баргузор мешавад, ки имрӯзҳо дар намоишгоҳи дастовардҳои хоҷагии халқ (ВДНХ)-и шаҳри Маскав ҷараён дорад.
Бино ба маълуомти хадамоти матбуоти сафорати Тоҷикистон дар Русия, Имомуддин Сатторов зимни суханронӣ ба дастандаркорони ин чорабинӣ миннатдорӣ изҳор намуда, аз иштирокчиёни ҳамоиш даъват ба амал овард, ки ин майдони тиҷорату ҳамкориро барои роҳандозии робитаҳои судманд миёни доираҳои тиҷоратӣ дар паҳнои ИДМ пурсамар истифода кунанд, зеро барои ин шароити мусоид мавҷуд аст.
Ҳамчунин сафир ба ҳозирин дар бораи шароитҳои мусоиди сармоягузории аз ҷониби ҳукумати ҷумҳурӣ дар Тоҷикистон муҳайёшуда маълумот дода, сармоягузорони имконпазирро ба иштироки фаъолона дар лоиҳаҳои сармоягузории Тоҷикистон даъват кард ва сипас бо гӯшаи маҳсулоти нассоҷону дӯзандагони Тоҷикистон аз наздик ошно гардид.
Қобили зикр аст, ки корхонаҳои Тоҷикистон
барои шашумин бор пайдарпай
бо мусоидат ва дастгирии Маркази тиҷорати байнулмилалӣ (МТБ) меҳмони намоишгоҳи байнулмилалии “Текстиллегпром” мегарданд, ки азимтарин намоишгоҳи махсус дар Федеросюни Русия мебошад.
