Ҳукумати Тоҷикистон дастур додааст, ки муҳлати пардохти боҷи гумрукӣ ва андоз аз арзиши иловашуда (ААИ) аз ҷониби ширкати «Шивер Тоҷикистон» барои воридоти маҳсулот ва таҷҳизот ба ҷумҳурӣ ба хотири ифтитоҳи гипермаркети «Ашан» дар Душанбе 6 моҳ мавқуф гузошта шавад.
Қарори дахлдори ҳукумати ҶТ дар ин хусус санаи 9 феврали соли равон ба имзо расида, тибқи ин санад, ҳаҷми умумии маблағи пардохташ батаъхирафтода 2 млн. 491 ҳазору 384 евроро ташкил медиҳад.
Ба хадамоти гумрук дастур дода шудааст, ки «бо анҷоми муҳлати таъхир ҷиҳати бидуни баҳс рӯёнидани маблағ мувофиқи талаботи қонунгузории амалкунандаи ҶТ тадбирҳо андешида, назорати дуруст пешниҳод намудани арзиши расмиёти гумрук ва истифодаи мақсадноки номгӯи маҳсулоти воридшударо таъин кунад».
Қобили зикр аст, ки ҳаҷми умумии сармоягузориҳои мустақим ба бунёди нахустин гипермаркет дар Тоҷикистон 7 млн. евроро ташкил медиҳад. Майдони ин мағоза 5 ҳазор метри мураббаъро ташкил дода, навъи маҳсулот аз 12 ҳазор адад иборат хоҳад буд.
Аз ҷумла, намояндагии Бонки аврупоии таҷдид ва рушд дар Душанбе барои сохтмони иншооти мазкур ба «Шивер-Тоҷикистон» – ширкати фаръии гурӯҳи Schiever, ширкати фаронсавӣ, ки шарики «Ашан групп» дар Фаронса ва Лаҳистон (Полша) мебошад, 5 млн. евро маблағ ҷудо кард.
Директори генералии «Шивер Тоҷикистон» Фредерик Лоббе қаблан зикр карда буд, ки «ҷорисозии савдои муосири чакана барои Тоҷикистон як инқилобест ва ба таъмини амнияти озуқавории кишвар мусоидат мекунад. Гипермаркети мо «Ашан» бо интихоби зиёди маҳсулоти хушсифат бо нархҳои дастрас барои ҳама мағозаи писандида хоҳад шуд».
Ҳамчунин лозим ба зикр аст, ки сокинони Тоҷикистон маъмулан маҳсулоти ғизойиро дар бозорҳо ва мағозаҳои начандон бузург харидорӣ мекунанд, ки дар онҳо нархи маҳсулот ба таври қобили мулоҳиза баландтар аст.
Тирамоҳи соли 2015
дар ин робита иттилоъ дода будем
, ки яке аз ширкати фурӯшандаи чакана (ритейлер)-и фаронсавии «Ашан» ба таҳвили маҳсулоти ғизойӣ ва дигар молҳо аз Русия ба Тоҷикистон шурӯъ кард.
«Дар остонаи ифтитоҳи мағозаи аввали «Ашан сити» дар Душанбе интиқоли санҷишии маҳсулоту борҳо аз Русия ба Тоҷикистон сурат гирифт. Беш аз 80%-и маҳсулоти бори нахуст интиқолдодашуда ба Тоҷикистонро ширкатҳои русиягӣ истеҳсол кардаанд», –
хабар дода буд
хадамоти матбуоти Aushan ба ВАО-и Русия.
Гипермаркети мазкур нахустин дар минтақаи Осиёи Марказӣ буда, имкон дорад, ки дар мағозаи нахустин 300 нафар кормандони маҳаллиро бо кор таъмин намояд. Тибқи ҳисобу китоби пешакӣ, пас аз ифтиоҳи гипермаркет ҳаҷми муомилоти он дар соли 2016 ба 270 млн. сомонӣ баробар шуда, ҳаҷми андоз аз арзиши иловашуда 41 млн. сомониро ташкил хоҳад дод.
