Таъсиси эътилофи сиёсии Афғонистону Покистон ва Тоҷикистон таҳти сарпарастии Чин яке аз мавзӯъҳои гуфтушунид байни намояндаи махсуси президенти Русия оид ба Афғонистон Замир Кобулов бо намояндаи махсуси Вазорати корҳои хориҷии Чин оид ба Афғонистон Дэн Ситсзюн гардид.
Замир Кобулов ба нашрияи
«Известия»
гуфтааст, дар мулоқот вазъи Афғонистон, таҳдиду хатарҳои эҳтимолӣ аз он ва ҳамкории ҳарду кишвар дар ин робита бидуни вобастагӣ ба шарикии нави стратегии усулии «чоргона» – Пекин, Исломобод, Душанбе ва Кобул баррасӣ шудааст.
Ба гуфтаи ӯ, дар гуфтушунид доир ба сафари сардори Ситоди кулли артиши Чин ба Кобул ва ваъдаи ҷудо кардани 300 млн. юан барои таҳкими артиш ва мақомоти пулиси Афғонистон, имкони маблағгузории муштараки Русияву Чин ба лоиҳаҳо дар ин кишвар ва дигар масъалаҳо сухан рафтааст.
Дар ҳамин ҳол, роҷеъ ба ҳамкории «чоргона» оид ба таъсиси низоми нави амният дар минтақа ибрози андеша шуда, Кобулов зикр кардааст, ки «ин иқдом мусбат буда, сухан танҳо сари назорати марзҳо ва фошсозии террористон меравад. «Ин маънои онро надорад, ки Чин қувваҳои мусаллаҳро истифода карданист. Ҳамроҳ шудани мо зарурат надорад. Дар доираи СААД мо тарҳҳои худро дорем ва гузашта аз ин дар чаҳорчӯби СҲШ мо ин мавзӯъҳоро баррасӣ мекунем», – гуфтааст Кобулов.
Нашрия хотиррасон мекунад, ки қаблан дар Душанбе гуфтушуниди сардорони ситодҳои кулли артишҳои Чин, Тоҷикистон ва Покистон доир гардида, баъди ин сардори ситоди кулли артиши Чин Фан Фэнхуй рӯзи 2 март ба Кобул ташриф овард ва дар он ҷо ба ҷуз ҳамоҳангсозии фаъолияти мақомоти ҳифзи ҳуқуқ, доир ба ташаккули заминаи қарордодиву ҳуқуқӣ миёни Пекин, Исломобод, Душанбе ва Кобил оид ба таъмини амният дар минтақа низ сухан рафтааст.
Ба гуфтаи коршиноси Маркази омӯзиши Афғонистони муосир Андрей Серенко, ин иқдом барои Русия хушоянд нест, зеро дар ин ҷараён Маскав иштирок надорад. «Ба эътилофи нав ба ҷуз Покистону Афғонистон, Чин Тоҷикистонро ҳам шомил мекунад, ки то замони ахир Русия ба он ҳамчун ба қисмате аз минтақаи таъсиру нуфузи худ назар мекард», – изҳор доштааст ӯ.
Ба андешаи коршинос, маҳз дар масъалаи Тоҷикистонро ҷалб намудани Чин нофаҳмӣ миёни Пекин ва Маскав ба назар мерасад. «Таваҷҷуҳи бештари Русия ба вазъ дар Украинаву Шарқи Наздик ба он оварда расонид, ки мо дар Осиёи Марказӣ мавқеъамонро аз даст дода истодаем. Ба назар мерасад, ки дар сурати таъсиси чунин «НАТО-и осиёимарказӣ» таҳти сарпарастии Чин Русия бегона шуда метавонад», – қайд кардааст А.Серенко.
