Президенти Афғонистон Муҳаммад Ашраф Ғанӣ, ки моҳи сентябри соли 2014 ба мансаби раисҷумҳури ин кишвар интихоб шуд, бори нахуст бо сафари расмӣ ба Тоҷикистон ташриф меорад.
Тавре ба «Азия-Плюс» як манбаъ аз ҳукумати ҷумҳурӣ дар ин робита иттилоъ дод, сафари расмии президенти Афғонистон ба Тоҷикистон дар доираи иштироки ӯ дар маросими оғози амалисозии лоиҳаи CASA-1000 (Лоиҳаи минтақавии интиқол ва савдои нерӯи барқ дар Осиёи Марказӣ ва Ҷанубӣ), ки санаи 12 май дар Душанбе пешбинӣ шудааст, сурат мегирад.
Дар маросими оғози амалисозии лоиҳаи CASA-1000 ба ҷуз раисҷумҳури Афғонистон, президенти Қирғизистон Алмазбек Атамбоев ва нахуствазири Покистон Муҳаммад Навоз Щариф ҳам ба Тоҷикистон ташриф меоранд.
