Дар ҷаласаи палатаи поёнии парлумони ҷумҳурӣ вазири рушди иқтисод ва савдои ҷумҳурӣ Неъматулло Ҳикматуллозода изҳор намуд, ки аз ҷониби ниҳоди зертобеъаш барномаи панҷсолаи дар кишвар роҳандозӣ намудани истеҳсоли як қатор молу маҳсулоти ивазкунандаи воридот мавриди таҳия қарор дорад.
Ба гуфтаи ӯ, барномаи зикршуда ба наздикӣ ҷиҳати тасдиқ ба ҳукумати кишвар пешниҳод шуда, мувофиқи он дар дурнамои миёнамуҳлат дар ҷумҳурӣ роҳандозӣ намудани истеҳсоли ҳадди ақал 20 номгӯи молу маҳсулоти ивазкунандаи воридот пешбинӣ шудааст, аммо вазир саҳеҳан аз ҷониби соҳибкорони ватанӣ истеҳсол шудани кадом навъи маҳсулотро зикр накард.
Раиси палатаи поёнии парлумон Шукурҷон Зуҳуров дар ин робита қайд кард, ки айни замон аз ҳаҷми умумии ҳосили пахтае, ки дар Тоҷикистон ҷамъоварӣ мешавад, ҳамагӣ 6% фоизаш дар дохилӣ ҷумҳурӣ коркард ва аз он маҳсулот истеҳсол мешавад.
«Ҳосили пахтаи боқимондаро мо бо нархи ночиз ба хориҷа мефурӯшем ва сипас бо нархи даҳчанд болотар маҳсулоти аз пахтаи худ истеҳсолшударо мехарем», – гуфт Зуҳуров.
