Комиссияи интихобот ва раъйпурсии шаҳри Душанбе оид ба санаи 29 май баргузор намудани маъракаи инихоботи пешазмуҳлати вакили Маҷлиси вакилони пойтахт аз ҳавзаи интихоботии Шоҳмансур 14 қарор қабул кард.
Тавре роҳбари комиссия Санавбар Раҳимова дар ин робита хабар дод, Латофат Назирова, ки моҳи марти соли 2015 аз ҳавзаи интихоботии №14 вакили Маҷлиси вакилони халқи шаҳри Душанбе интихоб шуда буд, дар иҷлосияи санаи 14 апрел ваколатҳои худро супурд.
Бо қарори ҳукумати ҷумҳурӣ Латофат Назирова муовини вазири маориф ва илми Тоҷикистон таъин шудааст.
Мутобиқи меъёрҳои қонунгузорӣ, замони дар вазифаи мазкур қарор доштан, ӯ дигар ба интихоб шудан ба ҳайси вакил дар ҳама гуна сатҳ ҳуқуқ надорад.
