Бо қарори Шӯрои уламои Тоҷикистон имсол дар Тоҷикистон Иди саиди Фитр санаи 6 июл ҷашн гирифта мешавад.
Раиси Шӯрои уламои Маркази исломии Тоҷикистон Саидмукаррам Абдулқодирзода ба «Азия-Плюс» дар ин робита иттилоъ дод, ки соати 06-30 дақиқаи субҳи рӯзи 6 июл дар ҳамаи масҷидҳои кишвар намози ид доир мегардад.
Мутобиқи қонуни Тоҷикистон «Дар бораи рӯзҳои ид», санаи ҷашнгирии анҷоми моҳи шарифи Рамазон дар кишвар рӯзи истироҳат эълон шудааст.
Ёдрас мекунем, ки имсол моҳи шарифи Рамазон дар Тоҷикистон аз 6 июн
шурӯъ гардида буд.
Рӯзадорӣ дар ин моҳи шариф яке аз панҷ рукнҳои ислом аст. Парҳезгорӣ қариб дар ҳамаи динҳо дунё вуҷуд дорад. Ҳадафи ин навъи ибодат дар дини ислом ҳарчи бештар наздикшавӣ ба Худо маънидод мешавад.
Моҳи шарифи Рамазон аз моҳҳои солшумории ҳиҷрии қамарӣ шуморида мешавад. Мусулмонон дар ин моҳ рӯза гирифта, бештар ба ибодат ва қироати Қуръон машғул мешаванд.
Рӯзи ид баъд аз супурдани фитри рӯза ва адои намози идона, мардум ба зиёрати хешовандону наздикон ва иддае барои фотеҳахонӣ сари мадфани гузаштагони худ мераванд. Баҳри пешвози меҳмонон дар хонаводаҳо дастурхони идона густурда шуда, кӯдакон низ бо табрикот ба хонаҳо мераванд ва ба онҳо дастовезҳои идона дода мешавад.
Қобили зикр аст, ки соли равон маблағи закот (андози ҳатмии солона ба фоидаи камбизоатон)-ро мусалмононе месупоранд, ки на камтар аз 17 ҳазору 400 сомонӣ воситаҳои зиёдатӣ доранд. Аз ин маблағ онҳо бояд 435 сомонӣ хайр кунанд.
Ҳаҷми садақаи фитр (хайрия) имсол 5 сомонӣ барои 1 моҳ ба 1 нафар муқаррар шудааст. Фидяи савм барои соҳибони узри шаръӣ (касоне, ки имкони рӯзагирӣ надоранд), 600 сомонӣ мукаррар шудааст, яъне ин афрод ҳар рӯзи моҳи рамазон бояд 20 сомонӣ хайрия диҳанд.
