Профессори Донишгоҳи техникии Таллин Кулдар Таветер зимни суҳбат бо журналистони тоҷик дар Эстония изҳор намуд, ки яке аз мактабҳои олии бузурги ин кишвар донишҷӯёни тоҷикро интизор аст.
Ӯ қайд кард, ки дар донишгоҳ 12 ҳазор нафар донишҷӯён таҳсил мекунанд, ки зиёда аз 600 нафарашон шаҳрвандони 60 кишвари саросари ҷаҳонанд, лекин миёни онҳо ягон шаҳрванди Тоҷикистон нест. «Дар факулта ва пажуҳишгоҳҳои донишгоҳ ҳудуди 2 ҳазор нафар машғули коранд, ки 154 нафарашон профессор мебошанд», – гуфт профессор.
Ба қавли Кулдар Таветер, таҳсил бо забонҳои эстонӣ ва англисӣ роҳандозӣ шуда, дар ин муассисаи таълимӣ факултаҳои сохтмон, энергетика, ҷомеашиносӣ, технологияҳои иттилоотӣ, кимиё ва технологияи мавод, иқтисод, математика, илмҳои табиӣ ва факултаи механика амал мекунанд.
Қобили зикр аст, ки таҷрибаи Эстония дар истифодаи ҳукумати электронӣ имрӯз намунаи ибрати бисёр кишварҳо аст. Аз ин рӯ, барномаи магистрии «Технология ва ҳизматрасониҳои электронӣ» миёни донишҷӯёни хориҷӣ бештар писандида аст.
