Дар Маркази тадқиқоти стратегӣ дар шаҳри Душанбе бахшида ба 25-умин солгарди роҳандозии муносибатҳои дипломатӣ миёни Тоҷикистону Русия таҳти унвони «Марҳилаҳои ҳамкории Тоҷикистону Русия: робитаҳои иқтисодӣ, амниятӣ ва гуманитарӣ» мизи гирди байнулмилалӣ ҷараён дорад.
Зимни суханронӣ дар ин чорабинӣ сафири Русия дар Тоҷикистон Игор Лякин-Фролов изҳор намуд, ки муносибатҳои Русия ва Тоҷикистон дар ҳоли рушд қарор дошта, сарфи назар аз буҳрони иқтисодӣ, соли гузашта ҳаҷми муомилоти молӣ миёни кишварҳо беш аз 1 млрд. долларро ташкил додааст.
«Ҳаҷми сармяогузориҳои андӯхтаи Русия ба иқтисоди Тоҷикистон 1,7 млрд. долларро ташкил медиҳад, – иброз дошт ӯ. – Бисёр корхонаҳои муштараки давлатҳо фаъолият дошта, ширкатҳои мобилии «Мегафон» ва «Таком» ба иқтисоди Тоҷикистон беш аз 50 млн. доллар сароягузорӣ кардаанд».
Сафир ҳамчунин аз рушди ҳамкориҳои низомӣ ва низомӣ-техникии кишварҳо сухан гуфта, қайд кард, ки ҳамасола дар мактабҳои олии ҳарбии Русия 600 нафар тоҷикистониён ба таҳсил фаро гирифта шуда, то 1 ҳазор нафар мутахассисони ҳарбии Тоҷикистон дар пойгоҳи низомии 201-ум дар давраҳои такмили ихтисосу омодагӣ таълим мегиранд.
«Дар бахшҳои маорифу фарҳанг низ ҳамкориҳо пурсамар ба роҳ монда шудааст, – зикр кард сафир. – Масалан, беш аз 20 ҳазор нафар тоҷикистониён дар мактабҳои олии Русия таҳсил намуда, дар ин самт Маркази илму фарҳангу Русия дар Душанбе нақши муҳим дорад ва ояндаи наздик ифтитоҳи филиали ин марказ дар Хуҷанд дар назар аст».
