Дар машқгоҳи Ҳарбмайдон рӯзи 30 март тамринҳои чоррӯзаи муштараки фармондеҳӣ ва ситод оид ба идоракунии гурӯҳи муттаҳидаи нерӯҳои Қувваҳои Мусаллаҳи Русия ва Тоҷикистон ба анҷом расиданд, ки муддати 4 рӯз дар 7 машқгоҳи низомии ҷануби Тоҷикистон ҷараён доштанд.
Дар марҳилаи хотимавии машқҳо хизматчиёнии ҳарбии ҳарду кишвар масъалаҳои дарёфт, ба муҳосира гирифтан ва ҳамкории нерӯҳо барои нест кардани гурӯҳҳои шартии мусаллаҳи ғайриқонуниро мавриди омӯзиш ва амал қарор доданд.
Бино ба маълумоти сомонаи Вазорати мудофиаи Русия, дар машқҳо аз техникаҳои ҳарбии навъҳои БТР-80, БТР-82, БМП-2, танкҳои Т-72, 122 силоҳи ирандозии артиллерии 2С1 «Гвоздика» ва низомҳои реактивии оташкушоии БМ-21 «Град» истифода шудааст.
Гуфта мешавад, нерӯҳои муттаҳидаро аз фазо гурӯҳи муштараки авиатсионии иборат аз ҳавопаймоҳои бомбандозу қиркунандаи навъҳои Су-24М, Су-25, Ту-22М3, чархболҳои ҷангиву боркаши Ми-8 ва Ми-24 дастгирӣ намуд.
Зимнан зикр мегардад, ки дар тамринҳои низомӣ дар машқгоҳи Ҳарбмайдон беш аз 2 ҳазор нафар хизматчиёни ҳарбӣ иштирок карда, ба он ҳудуди 700 адад техникаи ҳарбӣ ва махсус сафарбар шудааст.
