Қатораи автобусҳои мусофирбар, ки барои нақлиёти ҷамъиятии шаҳри Душанбе пешбинӣ шудаанд, ба пойтахти Тоҷикистон раҳсипоранд. Ин автобусҳо дар Туркия харидорӣ шуда, айни замон дар қаламрави Туркманистон ҳаракат доранд.
Вазири нақлиёти ҷумҳурӣ Худоёр Худоёрзода ба «Азия-Плюс» иттилоъ дод, ки рӯзҳои наздик 40 автобуси нави мусофирбар ба шаҳри Душанбе оварда шуда, айни замон дар қаламрави Турманистон ҳаракат доранд ва шоми имрӯз марзи Ӯзбекистонро убур мекунанд.
Ба гуфтаи ӯ, таваққуфи дурӯзаи ҳаракати автобусҳо дар марзи Эрон ба он вобаста буд, ки ин рӯзҳо дар он ҷо рӯзҳои истироҳат буданд ва баъди ба охир расидани рӯзҳои истироҳат, автобусҳо бидуни мушкилӣ аз марзи Эрон гузашта, ба роҳашон идома доданд.
Бино ба маълумоти Вазорати нақлиёт, айни замон Тоҷикистон аз Туркия 40 автобуси тамғаи Isuzu-и истеҳсоли Японияро харидорӣ намуда, тобистон боз харидории 24 адад чунин автобусҳо ба нақша гирифта шудааст.
Тибқи маълумоти корхонаи «Душанбенақлиётхадамотрасон», ҳамарӯза 3,3 ҳазор микроавтобусҳо ба сокинони пойтахт хизматгузорӣ мекунанд. Аз 417 автобуси мавҷуда 153-тоашон ва аз 116 троллейбус танҳо 72-тоашон дар хатсайрҳо равуо доранд. Аввали соли равон мақомоти шаҳрдории пойтахт ба хатсайри чанде аз микроавтобусҳо тағйирот ворид намуд.
