Раиси вилояти Суғд Абдураҳмон Қодирӣ ҳайати коршиносони Оҷонсии байналмилалии энергияи атомиро бо роҳбарии ҳамоҳангсози барномаҳои МАГАТЭ дар Тоҷикистон хонум Сандра Стейс ба ҳузур пазируфт.
Бино ба иттилои хадамоти матбуоти раиси вилояти Суғд, дар мулоқот масъалаи ҳамкориҳои вилоят бо ин ташкилот дар самти азнавсозӣ ва муҷаҳҳазгадонии Маркази саратоншиносии вилоят мавриди баррасӣ қарор дода шуд.
Бояд гуфт, ки сохтмони бинои нави шӯъбаи нурафкании Маркази саратоншинсии вилоят соли 2014 бо маблаггузории мақомоти иҷроияи ҳокимияти давлатии вилоят дар ҳаҷми беш аз 2,5 миллион сомонӣ оғоз гардида, то имрӯз корҳои асосии сохтмонӣ дар иншооти мазкур ба анҷом расонида шудаанд. Ҳамзамон ҷиҳати тақвияти пояи моддию техникии марказ аз буҷети вилоятӣ таҷҳизоти муосири ташхисию табобатӣ харидорӣ гардидаанд ва бино барои воридоту насби дастгоҳи нурафкании “ТЕРАБАЛТ” омода карда шудааст, ки ин кор дар ҳамдастӣ бо ташкилоти МАГАТЭ амалӣ мегардад ва маблағи он 400 ҳазор евроро ташкил медиҳад.
Дар ин замина ҳадафи ташрифи намояндагони МАГАТЭ ба вилоят ин мукаммалгардонии фаъолияти Маркази саратоншиносии вилоят, бахусус шӯъбаи нурафкании он буда, дар ин боздид масъалаи харидорӣ ва дастрас намудани томографи компютерӣ ва дастгоҳи нурафкании “ТЕРАБАЛТ” баррасӣ мешавад.
Дар ҷараёни сӯҳбат Раиси вилоят Абдураҳмон Қодирӣ ҳамзамон масъалаи омодосозии мутахассисони ҷавони вилоят ва таҷрибаомӯзии онҳоро дар марказҳои пешрафтаи саратоншиносии дунё ҷиҳати такмили донишҳои тиббӣ ва кор бо таҷҳизоти замонавӣ пешниход намуд, ки ин иқдом аз ҷониби ҳайати коршиносони МАГАТЭ бо қаноатмандӣ пазируфта шуд. Айни ҳол ду нафар мутахассиси нуршиноси Маркази саратоншиносии вилоят барои омӯзиши фаъолияти таҷҳизоти нурафканӣ ва муолиҷаи нурӣ дар Донишгоҳи миллии тиббии шаҳри Каунаси Ҷумҳурии Литва ва як нафар дар шаҳри Москваи Федератсияи Россия кор бо дастгоҳи мазкурро омӯхта, дорои сертификат гардидаанд.
Ҳайати намояндагони МАГАТЭ зимни вохӯрӣ инчунин доир ба иқдомҳои дигари пешгирии хатарҳои радиатсионӣ дар вилоят, аз ҷумла рӯйпӯшкунии партовгоҳи минтақаи Деҳмой аз ҷониби мақомоти иҷроияи ҳокимияти давлатии вилоят маълумот гирифтанд.
