Анҷумани XXXIII ғайринавбатии Ҳизби Коммунистии Тоҷикистон ба таърихи 22 апрели соли 2017 баргузор гардид.
Тибқи қарорҳои конференсияҳои шаҳриву ноҳиявӣ ва вилоятӣ ба анҷуман 80 нафар вакилон аз манотиқи гуногуни кишвар интихоб гардида буданд. Дар кори анҷуман 72 нафар вакилон ширкат варзиданд. Анҷуман бо пахши Суруди Миллӣ оғоз гардида, баъдан хотираи неки собиқ раиси Ҳизби Коммунистии Тоҷикистон Талбаков Исмоил Иброимович, ки дар Анҷумани XXXII ҲКТ моҳи августи соли 2016 интихоб гардида буд ва хотираи дигар коммунистони дар давраи байни Анҷумани XXXII ва Анҷумани XXXIII ғайринавбатӣ аз олам даргузашта бо дақиқаи хомӯшӣ пос дошта шуд.
Дар Анҷуман танҳо як масъала – интихоби раиси Ҳизби Коммунистии Тоҷикистон мавриди баррасӣ қарор дода шуд.
Оид ба пешбарии номзад ба раисии ҳизб котиби якуми кумитаи ҳизбии шаҳри Душанбе С. Сафиаллоев, котиби кумитаи ҳизбии вилояти Суғд Қ. Мирзоева, котиби кумитаи ҳизбии шаҳри Кӯлоб Ш. Сафаров, котиби кумитаи ҳизбии минтақаи Қӯрғонтеппаи вилояти Хатлон Х. Абдуназаров, котиби кумитаи ҳизбии ноҳияи Ҷайҳуни вилояти Хатлон Қ. Зулматов, котиби кумитаи ҳизбии ноҳияи Мастчоҳи вилояти Суғд Амонатова, котиби кумитаи ҳизбии ноҳияи Рӯдакӣ Н. Мирзоев ва котиби кумитаи ҳизбии Вилояти Мухтори Кӯҳистони Бадахшон Х. Рақамов ба сухан баромада, иброз доштанд, ки дар конференсияҳои ҳизбии шаҳру ноҳия ва вилоятҳои номбаршуда номзадии котиби Кумитаи Марказии Ҳизби Коммунистии Тоҷикистон Абдуллоев Мироҷ Санонович ба вазифаи раиси Ҳизби Коммунистии Тоҷикистон аз ҷониби коммунистон дастгирӣ ёфта, пешниҳод гардидааст.
Ин пешниҳодҳоро дигар вакилони анҷуман низ дар баромадҳояшон дастгирӣ намуданд.
Интихоби раиси Ҳизби Коммунистии Тоҷикистон ба таври овоздиҳии кушода бо пешниҳоди вакилони анҷуман баргузор гардид ва вакилон ҳама ба тарафдории Абдуллоев Мироҷ Санонович барои интихоб шудан ба вазифаи раиси Ҳизби Коммунистии Тоҷикистон якдилона овоз доданд.
Раиси тозаинтихоби ҳизб М.С. Абдуллоев ба вакилони анҷуман барои ба чунин вазифаи масъулиятнок бовар карда, ӯро интихоб намудан изҳори миннатдорӣ намуд. Вай ҳамчунин иброз дошт, ки барои муттаҳидии ҳарчи бештари ҳизб, пурзӯр гардонидани ташкилотҳои ҳизбӣ аз поён то ба боло, густариш додани фаъолияти кумитаҳои ҳизбӣ бо мақомоти иҷроияи ҳокимияти давлатӣ дар маҳалҳо баҳри таҳкими истиқлолият ва тақвияти ваҳдати миллӣ, якпорчагии кишвару мусоидат намудан ба бунёдкориву ободонии Ватани ягона – Тоҷикистони тозаистиқлол пайваста ҷидду ҷаҳд менамояд.
Дар кори анҷуман намояндаи Вазорати адлияи Ҷумҳурии Тоҷикистон Раъно Бобоева иштирок намуда, баромад кард.
Пас аз анҷуман раиси тозаинтихоби ҳизб Мироҷ Санонович бо котибони кумитаҳои ҳизбии шаҳру ноҳияҳо ва вилоятҳо аввалин маҷлис – машварат доир намуд, ки дар он фикру андешаҳои ҷолиб, пешниҳодҳои мушаххаси котибони кумитаҳои ҳизбии манотиқи гуногуни кишвар баҳри пешрафти кори ҳизб шунида шуд.
