Ҳунармандзани маъруфи балети Русия Анастасия Волочкова аз мушкилоти як оилаи тоҷикон огаҳ гардида, ба онҳо дар манзили худ сарпаноҳ додааст.
Бино ба маълумоти ВАО-и Русия, ӯ тасодуфан аз шунидани аҳволи хеле мушкили зодагони Осиёи Марказӣ, ки зан ҳатто ҳомиладор будаасту барои иҷорапулӣ ва зиндагии рӯзмарра маблағе надоштаанд, хеле мутаассир шуда, онҳоро барои зист ба манзили худ даъват кардааст.
«Ман чунин мешуморам, ки агар мо ба касе кумак карда тавонем, ҳатман инро бояд ба анҷом расонем ва агар ҳар кадоме аз мо дар ҳаёт каме ба корҳои неку хайрхоҳона даст занад, ҳаёт албатта беҳтар хоҳад шуд», – овардааст гуфтаҳои Волочковаро «Собеседник».
Гуфта мешавад, баъди таваллуд Лолитаро бо тифлаш ба манзили Волочкова оварда, ӯ ба онҳо дар бинои ҳайати кормандонаш ду ҳуҷра ҷудо кардааст. Волидони кӯдакро дар хона ба кор гирифта, ба онҳо барои кумак дар корҳои хона музди меҳнати хуб медиҳад. Ӯ тоҷиконро акнун қисмате аз аҳли оилаи худ ҳисобида, маросиму идҳоро ҳама ҳамроҳ ҷашн мегиранд.
