Дар анҷумани ғайринавбатии Иттифоқи оҳангсозони Тоҷикистон Хуршед Низомов, хатмкардаи Донишкадаи давлатии фарҳанг ва санъати Тоҷикистон ба номи Мирзо Турсунзода раиси нави Иттифоқи оҳангсозони Тоҷикистон интихоб шуд.
Ин мансаб аз моҳи декабри соли гузашта холӣ буд. 10 декабри соли 2016 раиси пешини Иттифоқ Шуҳрат Ашӯров ба таври фоҷеабор аз олам даргузашт. Автомашинае, ки таҳти идораи бародари 35-солааш қарор дошт, ба ҷарии чуқуриаш 70 метр сарозер рафта, Шуҳрат Ашӯров дар ҷойи ҳодиса ҳалок ва бародараш ҷароҳат бардошт.
Ҳунарманди халқии Тоҷикистон Шуҳрат Ашӯров 6 июни соли 2016 раиси Иттифоқи оҳангсозони Тоҷикистон интихоб шуда буд.
Хуршед Низомов қаблан дар ҳайати Оркестри эстрадии «Гулшан», Оркестри созҳои миллии Филармонияи давлатии Тоҷикистон ба номи Акашариф Ҷӯраев кор кардааст. То замони интихоб ба ин мансаб ба ҳайси сардори шуъбаи илм ва муассисаҳои таълимӣ, сардори шуъбаи идоракунии корҳо ва назорат, сардори раёсати рушди муассисаҳои фарҳангӣ-фароғатӣ ва ҳунарҳои мардумии Вазорати фарҳанги ҶТ ифои вазифа намудааст.
Аз соли 2014 узви Иттифоқи оҳангсозони Тоҷикистон буда, бо медали «Хизмати шоиста» сарфароз гардонида шудааст.
