Аз 30 май то 1 июн дар ду машқгоҳи ҳарбии гарнизони Хатлон – «Ҳарбмайдон» ва «Лоҳур» марҳилаи фаъоли тамринҳои байнулмилалии «Душанбе – Зиддитеррор – 2017» доир мегардад, ки нахустин тамрини Маркази зиддитеррористии ИДМ бо ҷалби Қувваҳои Мусаллаҳи кишварҳои узви Иттиҳод мебошад.
Тавре ба «Азия-Плюс» як манбаъ аз сохторҳои қудратии ҷумҳурӣ иттилоъ дод, дар ҷараёни тамринҳо гурӯҳи муштараки нерӯҳои хушкигарди Тоҷикистону Русия бо дастгирии авиатсия тарзу усулҳои мубориза бо гурӯҳҳои террористӣ дар мавзеи кӯҳистон ва ҳамчунин таркибҳои амалиёти таъмини сулҳу осоиштагиро мавриди омӯзиш ва дар амал месанҷанд.
Зикр гардид, ки айни замон масъалаи шумори сарбозону афсарон, техникаи низомӣ ва авиатсияи ба ин тамринҳо ҷалбшуда мувофиқа мешавад.
Қаблан иттилоъ дода шуда буд, ки машқҳо моҳҳои май ва июн дар қаламрави 6 кишвар (Русия, Арманистон, Беларус, Қазоқистон, Қирғизистон ва Тоҷикистон) баргузор шуда, дар ҳамин ҳол, марҳилаи ниҳоии тамринҳо дар Тоҷикистон доир мегарданд.
Барои иҷрои вазифаҳои дар тамрин гузошташуда имконоти пойгоҳи низомии 201-уми Русия дар Тоҷикистон пурзӯр карда мешавад. Ба мавзеъҳои тамрин нуқтаҳои зудамали идоракунӣ, воҳидҳои гуногуни авиатсия ва артиллерия, ҳамчунин нерӯҳои таъиноти махсус ва воҳидҳои ҳавоӣ-десантӣ сафарбар мешаванд.
Амалиёти гурӯҳҳои муштараки нерӯҳои низомиро муҳандисон, табибон, мутахассисони низомӣ ва воҳидҳои ҳимояи радиатсионӣ, кимиёвӣ, биологӣ ва ғайра таъмин мекунанд.
Ҳамоҳангсози амалиёти тамринҳои низомӣ Кумитаи давлатии амнияти милллии Тоҷикистон мебошад.
