Дар саросари ҷаҳон зиёда аз 2,7 млн. нафар кӯдакон дар хонаҳои кӯдакон ва интернатҳо зиндагӣ мекунанд. Дар ин бора бо истинод ба Хазинаи кӯдакони СММ (ЮНИСЕФ) Хадамоти иттилоотии СММ хабар медиҳад.
«Кӯдаконе, ки дар муассисаҳои давлатӣ, аз қабили интернату сағирхонаҳо иқомат мекунанд, аллакай осеб дидаанд ва дар он ҷо онҳо метавонанд қурбони хушунату таҳқир қарор гиранд, ки ба рушди иҷтимоиву равонии онҳо таъсир манфӣ мерасонад», – гуфтааст намояндаи ЮНИСЕФ Корнелиус Уилямс.
Дар гузориши нави ЮНИСЕФ доир ба вазъи кӯдакон дар 140 кишвари дунё маълумот дода шуда, муаллифони он хотиррасон мекунанд, ки ҳар як кӯдак ба муҳаббату ғамхории пайвандон ниёз дорад ва набояд дар сағирхона, балки дар оила зиндагонӣ кунад.
Дар саросари дунё дар маҷмӯъ ба ҳар 100 ҳазор нафар кӯдак 120 нафар кӯдак дар сағирхонаҳо рост меояд. Дар кишварҳои Аврупои Марказӣ ва Шарқӣ, ҳамчунин Осиёи Марказӣ ин нишондиҳанда панҷ барбар зиёдтар аст. Дар ин кишварҳо дар интернат ва хонаҳои кӯдакон 664 ҳазор нафар кӯдакон зиндагӣ мекунанд – аз ҳар 100 ҳазор 666 нафар. Дар ҳамин ҳол, қариб нисфи тарбиятгирандагони интернатҳо дар кишварҳои собиқ шӯравӣ ин ё он гуна навъи маъюбӣ доранд.
«Мо талош дорем, ки кӯдаконро ба сағирхонаҳо насупурда, дар хона тарбия гиранд, – таъкид доштааст Корнелиус. – Ин бахусус дар марҳилаи барвақтии рушди кӯдак хеле муҳим аст».
Соли 2016 дар Тоҷикистон ба сурати умум 46,2 ҳазор нафар кӯдакони ятим ба қайд гирифта шудаанд, ки беш аз 2 ҳазор нафарашон падару модар надоранд.
Ҳамасола даҳҳо нафар ба хонаҳои кӯдакон супурда мешаванд, вале на ҳамаи онҳо ятимони кулланд. Қисмати асосии онҳоро кӯдаконе ташкил медиҳанд, ки бо ин ё он сабабе волидонашон муваққатан ба тарбияи давлат гузоштаанд.
Ҳамчунин ҳамасола танҳо дар шаҳри Душанбе наздики 200 оила барои ба фарзандӣ қабул кардани кӯдакон навбат мегиранд ва танҳо ба 8 оила муяссар мешавад, ки кӯдакеро фарзанд хонанд. Боқимонда 192 оила боз мунтазир шуда ё бо тарзи ғайриқонунӣ кӯдакро ба фарзандӣ мегиранд.
Охири соли 2015 аз хориҷи кишвар ба Тоҷикистон 4 тифл оварда шуда, соли гузашта 54 кӯдак ба ватан баргардонида шуд. Инҳо асосан кӯдаконе мебошанд, ки волидонашон аз онҳо даст кашидаанд, вале миёни онҳо кӯдаконе низ ҳузур доранд, ки волидонашон дар Русия маҳкум шудаанд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
