Вазорати мудофиаи Русия изҳор мекунад, ки бар асари зарбаҳои ҳавоии авиатсияи ин кишвар дар Сурия, эҳтимол пешвои созмони террористии «Давлати исломӣ» (ДИ) Абӯбакр ал-Бағдодӣ кушта шудааст.
Хабаргузории «Медуза» дар ин робита менависад, дар хабари Вазорати мудофиа зикр гардидааст, ки алҳол ин маълумотро санҷидан зарур аст.
Низомиёни Русия хабар додаанд, ки зарбаи ҳавоӣ рӯзи 28 май ба ҳадафи дар наздикии шаҳри Раққа қарордошта сурат гирифтааст. Шаҳри Раққаро «пойтахт»-и Давлати ислмоӣ дар Сурия ном мебаранд.
Қобили зикр аст, ки дар васоити ахбори умум чандин маротиба дар бораи марги Абӯбакр ал-Бағдодӣ маълумот мунташир гардида, вале ҳар дафъа ин маълумотҳо тасдиқи худро намеёфтанд.
Абӯбакр ал-Бағдодӣ пас аз қатли пешвои собиқи гурӯҳ Абӯ Умар ал-Бағдодӣ (апрели оли 2010) 16 майи соли 2010 созмони террористии «Давлати исломӣ»-ро ба роҳбарӣ гирифт. Васоити ахбори умум Абӯбакр ал-Бағдодиро «вориси ҳақиқии Усома бин Лодан» унвон карда, ӯ бо тундгароӣ ва бераҳмии худ маъруф аст.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
