Президенти Тоҷикистон Эмомалӣ Раҳмон дар бораи ҷудо кардани 3 млн. сомонӣ барои ташкили истироҳати кӯдакону наврасон дар лагерҳо қарор ба имзо расонид.
Дар қарор ба раисони ҳокимиятҳои маҳаллии давлатӣ дастур дода шудааст, ки корҳои сохтмону таъмири таҷҳизоти бино, майдонҳои варзишӣ, ҳавзҳои шиноварӣ, кабудизоркунии лагерҳоро дар муҳлати муқарраршудаба итмом расонанд.
Гуфта мешавад, ба кушодани ҳама гуна навъи лагерҳо танҳо дар асоси хулосаи мақомоти давлатии назорати санитарӣ-эпидемиологӣ иҷозат дода мешавад.
Бо роҳхатҳо ба лагерҳо дар навбати аввал бояд кӯдакони ятиму бесаробонмонда, кӯдакону наврасон аз оилаҳои камбизоат ва кӯдакони лаёқатманд таъмин карда шаванд.
Вазорати маорифи кишвар ба раҳбарии методӣ, андешидани тадбирҳо ҷиҳати пурсамар гузаронидани чорабиниҳои таълимӣ ва тарбиявӣ ва таъмини лагерҳо бо кадрҳои педагогӣ вазифадор гардидааст.
Ба Вазорати тандурустӣ дастур дода шудааст, ки оид ба таъмини лагерҳо бо кадрҳои зарурии тиббӣ, таъмини назорати вазъи санитарӣ дар давоми таътил тадбирҳо андешад.
Таъмини амнияти кӯдакону наврасон дар лагерҳо, ҳамчунин бехатарии равуои онҳо ба макони истироҳат ба дӯши Вазорати корҳои дохилӣ вогузор шудааст.
