Пойтахти Тоҷикистон бори нахуст дар таърихи худ муобиқаи бонуфуз дар ҷаҳони теннис – Ҷоми Федератсия (Fed Cup)-ро қабул мекунад. Ин мусобиқаи бузургтарини теннис миёни занон дар ҳайати дастаҳо маҳсуб меёбад.
Мусобиқа аз ҷониби Федератсияи байнулмилалии теннис созмон ёфта, монанди чемпионати ҷаҳон байни занон аст. Мусобиқаи ба ин монанди миёни мардон бо номи Ҷоми Дэвис маъруф аст.
Дастаи мунтахаби мардонаи тенниси Тоҷикистон мунтазам дар мусобиқаҳои Ҷоми Дэвис ширкат меварзад. Мунтахаби занона танҳо як маротиба – соли 1998 дар мусобиқаи Ҷоми Федератсия иштирок кардааст.
Акнун баъди танафуси тӯлонӣ теннисбоззанони Тоҷикистон дар Чемпионати гурӯҳи II минтақаи “Осиё-Океания” дар пойтахти Тоҷикистон ҳунарнамоӣ мекунанд.
Мусобиқа аз 17 то 23 июл дар майдонҳои теннисти Варзишгоҳи марказии Душанбе доир гардида, дар он намояндагони 13 кишвари минтақа – Гонконг, Индонезия, Эрон, Қирғизистон, Малайзия, Зеландияи Нав, Покистон, Сингапур, Туркманистон, Ӯзбекистон, Шри-Ланка рақобат мекунанд.
Ҳамчунин дар ин мусобиқа таҳти парчами ягона намояндагони кишварҳои хурди ҷазираҳои ин минтақа ширкат меварзанд. Ҳайати даста аз капитан (дар тенниси бузург мураббӣ капитан номида мешавад) ва 4 бозигар иборат аст.
Ҳайати дастаи мунтахаби Тоҷикистон – Анастасия Турсунова (16-сола, Душанбе), Таҳминахон Бурҳонова (23-сола, вилояти Суғд), Комила Муллоева (17-сола, Душанбе) ва Наргисахон Яҳёева (15-сола, Душанбе). Капитани даста – мураббӣ Мансур Яҳёев.
Анастасия Турсунова – теннисбоззани рақами 1-и Тоҷикистон, қаҳрамони амалкунандаи ҷумҳурӣ, ғолиби мусобиқаи Ҷоми Президенти Тоҷикистон.
Тибқи барномаи мусобиқа, 13 дастаи гурӯҳи II минтақаи “Осиё-Океания” ба ду зергурӯҳ ҷудо шуда, ғолибони гурӯҳҳо ба сатҳи баландтари гурӯҳҳо роҳхат мегиранд ва минбаъд дар гурӯҳи бештар пурқуввати I қувваозмоӣ мекунанд.
