Фармондеҳи нерӯҳои хушкигарди Фармондеҳии марказии ИМА генерал-лейтенант Майкл Гарретт рӯзи 16 август бо сафари якрӯза ба Душанбе ташриф меорад.
Тавре ба «Азия-Плюс» як манбаъ аз соъхторҳои қудратии ҳукумати ҷумҳурӣ хабар дод, ин нахустин сафари фармондеҳи нерӯҳои хушкигарди артиши ИМА ба Тоҷикистон буда, дар Душанбе генерали амрикоӣ бо намояндагони Вазорати мудофиа ва Ситоди кулли Қувваҳои Мусаллаҳи Тоҷикиситон дидору гуфтушунид мекунад.
Ба иттилои манбаъ, дар дидору гуфтушунидҳо намояндагони ИМА ва Тоҷикистон масъалаҳои ҳамкорӣ дар бахши таъмини амният, таҳкими посбонии марзи Тоҷикистону Афғонистон ва мусоидат ба таъмини сулҳу субот дар Афғонистонро баррасӣ мекунанд.
Қобили зикр аст, ки охири соли гузашта Майкл Гарретт бори нахуст аз Қазоқистону Ӯзбекистон боздид намуда, сафар ба Тошканд дар чаҳорчӯби ҳамкории сатҳи баланд бо ҳукумат ва Вазорати мудофиаи Ӯзбекистон дар соҳаи амният сурат гирифта буд.
Дар Қазоқистон, тибқи маълумоти Tengrinews , сари ҳамкории дуҷониба, аз ҷумла ҷараёни таҳияи нақшаи панҷсола (солҳои 2018-2022)-и ҳамкорӣ дар самтҳои тибби саҳроии ҳарбӣ, тайёр кардани ҳайати шахсии воҳидҳои минатозакун ва муҳандисӣ, таҳкими имконоти сулҳофаринии нерӯҳои низомии Қазоқистон ва масъалаҳои умумии амнияти минтақавӣ сухан рафта буд.
