Додгоҳи низомии ҳавзаи Приволжскийи Русия Владимир Квачков, полковники собиқи ГРУ – идораи ҷосусии артиши Русияро бо ҷурми барангехтани низоъ ва адоват ба якуним соли зиндон маҳкум кард.
Бино ба иттилои сомонаи расонаи мустақили Akhbor.com, Квачков, ки мебоист озод шавад, акнун ду соли дигар – ним соли боқимонда аз ҳукми қаблиаш ва якуним соли ҳукми наваш – дар зиндон хоҳад монд.
Гуфта мешавад, ҳукми нави Квачков барои видеоест, ки ӯ дар соли 2015 аз зиндон фиристода буд. Дар он видео мардум ба муқовимат бо ҳукумати кунунии Русия даъват мешуд. Ин видео аз ҷониби мақомоти Русия ифротӣ шинохта шуд ва ба зидди полковники балвогар парвандаи нав кушоданд.
Квачков дар соли 2005 барои сӯиқасд ба ҷони Анатолий Чубайс ва дар соли 2013 бо ҷурми омодагӣ ба табаддулоти низомӣ дар Русия маҳкум ба зиндон шудааст.
Владимир Квачков дар соли 1992 фармондеҳии бригадаи 15-уми нирӯҳои вижа (спецназ)-и ГРУ-ро бар дӯш дошт. Квачков дар як мусоҳиба қабл аз маҳкум ба зиндон шуданаш гуфта буд, ки дар ҳодисаҳои соли1992-юми Тоҷикистон нақши асосӣ дошт ва аз ҷумла Фронти халқӣ – яке аз тарафҳои ҷанги шаҳрвандии Тоҷикистонро ӯ сохта ва ӯ Сангак Сафаровро аз байни чанд номзад ҳамчун раҳбари ин Фронт интихоб кардааст. Квачков дар он мусоҳиба гуфт, азбаски Сангак Сафаров зоҳиран ба адиби амрикоӣ Эрнест Ҳемингуэй монанд буд, ба вай лақаби "Хеми” доданд.
Квачков ҳамчунин дар он мусоҳиба эътироф мекунад, ки дар назди ӯ моҳи августи соли 1992 вазифа гузошта буданд, ки ҳукумати муросои миллиро дар Тоҷикистон сарнагун карда ва ба ҷои он як ҳукумати рӯ ба Маскавро ба қудрат биорад. Квачков гуфт, ки вай тавонист ин вазифаро дар зарфи ҳамагӣ се моҳ – то моҳи ноябри соли 1992 анҷом диҳад.
