Зимни мулоқоти раиси Палатаи савдо ва саноати Тоҷикистон (ПСС ҶТ) Шариф Саид ва директори генералии ширкати «Делта Фарма Био»-и Миср Муборак Солеҳ зикр гардид, ки ин ширкат ҷиҳати сармоягузорӣ ба индустрияи дорусозии Тоҷикистон омода аст.
Бино ба иттилои дафтари матбуоти ПСС ҶТ, дар вохӯрӣ ҷонибҳо дурнамои самтҳои ҳамкорӣ дар бахшҳои дорусозӣ ва тандурустӣ, роҳандозии низоми табодули таҷриба миёни мутахасисони ҳарду кишварро баррасӣ карданд.
Муборак Солеҳ гуфтааст, ширкати зери роҳбарии ӯ ба истеҳсоли доурворӣ ва дастгоҳҳои тиббӣ ва ҳамчунин дигар маснӯоти таъиноти тиббӣ машғул аст.
«Ширкат ҷиҳати сармоягузорӣ ба роҳандозии зинаи пурраи хатҳои истеҳсолӣ-технологӣ дар корхонаҳои дорусозии Тоҷикистон дар заминаи технологияҳои муосир ва таҷҳизот аз Миср мутобиқи меъёрҳои байнулмилалӣ омода аст», – иброз доштааст ӯ.
Директори генералии ширкати «Делта Фарма Био» ҳамчунин ба интиқоли технологияҳои тиббии Миср ва доруворӣ, дастгоҳҳои гуногуни гурӯҳҳои терапевтӣ, аз ҷумла барои муолиҷаи гепатит ба бозори Тоҷикистон омодагӣ изҳор намудааст.
