Раиси Ҳизби сотсиал-демократии Тоҷикистон (ҲСДТ) мутмаин аст, ки дар кишвар ҷомеаи шаҳрвандӣ ташаккул наёфтааст ва дар ин замина бисёрҳизбӣ афсонае беш нест.
«Дар Тоҷикистони имрӯза низоми мавҷудияти аҳзоби сиёсӣ вуҷуд надорад ва чун аҳзоби сиёсӣ як гунае «маҳсулот»-и ҷомеа шаҳрвандӣ мебошанд, пас ман бо тамоми масъулият изҳор мекунам, ки имрӯз дар кишвар худи ҷомеаи шаҳрвандӣ ҳам вуҷуд надорад», – гуфт дар мусоҳиба ба «Азия-Плюс» раиси ҲСДТ Раҳматилло Зойиров.
Ба гуфтаи ӯ, бисёрҳизбие, ки ҳукуматдорон мегӯянд, дар Тоҷикистон амалан вуҷуд надорад. «Масалан, дар ИМА беш аз 200 ҳизб расман вуҷуд дорад, вале воқеан ду ҳизби ба ҳам мухолиф – демократӣ ва ҷумҳурихоҳ амал мекунанд. Дар Тоҷикистони мо бошад, танҳо як Ҳизби ҳокими халқии демократӣ амал мекунад», – мегӯяд номбурда.
Дар ҳамин ҳол, раиси ҲСДТ қайд кард, ки ба пешниҳоди Алим Шерзамонов, раҳбари Ҳизби сотсиал-демократ дар ВМБК доир ба муваққатан қатъ кардани фаъолияти ҲСДТ комилан розӣ нест.
«Чунин тартиботи «муваққатан қатъ кардани фаъолияти ҳизб» умуман вуҷуд надорад ва ман пешниҳоди Шерзамоновро ғайриматиқӣ мешуморам», – мегӯяд Зойиров.
Ӯ хотиррасон намуд, ки ҳизбҳои сиёсӣ барои бо роҳи муборизаи сиёсӣ дар доираи қонунгузорӣ ноил гардидан ба ҳадафҳои барномавии худ таъсис дода мешаванд.
Раиси ҲСДТ изҳор дошт, ки дар шароити Тоҷикистони имрӯза ҳизби ӯ аз изҳороти пурсарусадо худдорӣ варзида, вале вуҷуд дорад ва фаъолияти худро қатъ накардааст, ҳарчанд аксари ҷонибдорони ҳизб дар хориҷи кишвар, дар муҳоҷират қарор доранд.
Зойиров қайд кард, ки ахиран худаш ҳам маҷбур аст, ки аксари вақташро берун аз қаламрави Тоҷикистон гузаронад.
«Бо сабабҳои маълум ман дар Тоҷикистон ба сифати ҳуқуқшинос ё адвокат кор карда наметавонам ва барои таъмини рӯзгор ба Русия ва Қазоқистон меравам. Ғайр аз ин, дар интихоботи парлумонии соли 2015 ҲСДТ пули зиёд хароҷот кард, ки мо қарз гирифта будем ва акнун онҳоро бояд баргардонем», – гуфт Зойиров.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
