Ширкати ҳавопаймоии Тоҷикистон пурра арзиши парвози шаҳрванди Русия Татяна Хужинаро ҷуброн карда, ба ӯ ва духтарчааш билетҳои нав дод ва субҳи имрӯз онҳо ба Маскав раҳсипор шуданд.
“Аздусар ман Душанберо дӯст медорам, ин шаҳр барои ман ҳамеша зодгоҳи асосӣ боқӣ мемонад, ман мардуми тоҷикро барои меҳрубонӣ ва самимияташон дӯст медорам. Сарфи назар аз воқеае, ки бо ман рух дод, муносибатам нисбати ватанам ва мардуми он тағйир наёфтааст. Тоҷикистонро ҳамеша пазмону ёд хоҳам кард”, – гуфт Татяна Хужина ба “Азия-Плюс” пеш аз парвоз аз Душанбе.
Ёдрас мекунем, ки шаҳрванди Русия Татяна Хужина ба кӯшиши қочоқи тангаи мисии замони Русияи подшоҳӣ айбдор шуда, ба пардохти 5 ҳазор ҷарима маҳкум шуд. Дар пардохти нисфи маблағи ҷарима ба ӯ раҳбарияти ширкати “Газпромнефт Тоҷикистон” кумак кард.
Ҳукми суд рӯзи 4 сентябр расман мавриди амал қарор гирифта, ҷарима пардохт ва баёноти тарк накардани маҳалли зист бекор шуд ва баъди ин Хужина Тоҷикистонро тарк кард.
Татяна Хужина дар Душанбе таваллуд шуда, ба воя расидааст. Ду соли охир дар вилояти Ярославли Русия иқомат дорад. Тобистони имсол ба Душанбе ба меҳмонӣ омада, рӯзи 18 июн баргаштанӣ буд, вале ӯро дар фурудгоҳ боздошт ва ба парвозаш иҷоза надоданд.
