Сафири Озарбойҷон дар Тоҷикистон Аббосалӣ Гасанов зимни вохӯрӣ бо вазири саноат ва технологияҳои нави Тоҷикистон Шавкат Бобозода дар Душанбе изҳор намуд, ки мавҷуд набудани хатсайри ҳавоии мустақими Боку – Душанбе, сарфи назар аз имконоти зиёд, ба рушди ҳамкориҳо миёни Тоҷикистону Озарбойҷон дар соҳаҳои гуногун монеъа эҷод мекунад.
Бино ба маълумоти ВАО-и Озарбойҷон, дар мулоқот масъалаи таҳвили маҷмӯи васеи маҳсулоти Озарбойҷон ба бозорҳои Тоҷикистон баррасӣ шуда, зикр гардидааст, ки сармоягузорони озарбойҷонӣ ба иқтисоди Тоҷикистон таваҷҷуҳ дошта, аз ҷониби Тоҷикистон муҳайё сохтани шароитҳои мусоид барои ҷалби сармояи хориҷӣ, соддатар кардани расмиёти андозбандӣ ва боҷҳои гумрукӣ муҳим аст.
Дар робита ба барқарор кардани фаъолияти хатсайри ҳавоии Душанбе – Боку сафир қайд кардааст, ки ин масъала то ҳанӯз ҳалношуда боқӣ монда, ба амалисозии ҳамкориҳо дар бахшҳои иқтисоду тиҷорат, илму фарҳанг ва дигар соҳаҳо миёни кишварҳо монеъа ба вуҷуд меорад.
Қобили зикр аст, ки ахиран имкони барқарор кардани хатсайри мустақими ҳавоӣ миёни Душанбе ва Бокуро ҷонибҳо чандин маротиба дар сатҳҳои гуногун баррасӣ мекунанд.
Ин хатсайр моҳи майи соли 2012 боз шуда, вале бинобар сабаби нокофӣ будани талаботи мусофирон ба он, боздошта шуд. Баъдан моҳи марти соли 2013 парвозҳо тариқи ин хатсайр боз дубора барқарор шуда, ин дафъа низ бо сабаби дар боло зикргардида мутаваққиф шуд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
