Субҳи рӯзи 16 ноябр Президенти Тоҷикистон Эмомалӣ Раҳмон бо мақсади иштирок дар тантанаҳои идонаи ҷашни 25-умин солгарди Иҷлосияи таърихии 16-уми Шӯрои Олии Тоҷикистон, ифтитоҳи як қатор иншооти муҳим ва суҳбату мулоқот бо мардум бо сафари корӣ ба вилояти Суғд ташриф овард.
Бино ба иттилои хадамоти матбуоти сарвари давлат, сафари кории Эмомалӣ Раҳмон аз шаҳри Истиқлол оғоз гардида, бо иштироки Президенти мамлакат Корхонаи металлургии Ширкати саноати кӯҳии Тоҷикистону Хитой, ки бо харҷи 57 миллион доллари амрикоӣ сохта шудааст, мавриди баҳрабардорӣ қарор гирифт.
Пас аз ифтитоҳи корхона Президенти Тоҷикистон бо кормандони Корхонаи металлургии "Ширкати кӯҳиву саноатии Тоҷикистону Хитой" ва роҳбарияту фаъолони шаҳри Истиқлоли вилояти Суғд мулоқоти судманд анҷом дод.
Зимни суханронӣ дар маросими ифтитоҳи корхонаи металлургӣ дар шаҳри Истиқлол Сарвари давлат изҳор намуд, ки бунёди корхонаи металлургӣ, ки боз як қадами ҷиддӣ ба сӯи саноатикунонии мамлакат ба ҳисоб меравад, бо иқтидори истеҳсолии 50 ҳазор тонна металли сурб дар як сол идомаи раванди бунёдкориву созандагӣ дар кишвари соҳибистиқлоламон аст.
Дар рӯзи аввали сафар ба вилояти Эмомалӣ Раҳмон ҳамчунин дар шаҳри Бӯстон ба фаъолияти коргоҳҳои дӯзандагӣ ва пойафзолбарории Корхонаи давлатии кишоварзии "Палос"-и Агентии таъминоти амволи махсуси назди ҳукумати Тоҷикистон оғози расмӣ бахшид.
