Раёсати БДА ВКД Тоҷикистон ба маълумоти ронандагони воситаҳои нақлиёти кишвар мерасонад, ки то анҷоми муҳлати ивази шаҳодатномаҳои ронандагии 10 сол пеш додашуда ва рақамҳои давлатии ғайристандартӣ ҳамагӣ 7 рӯз боқӣ монд.
Дар сомонаи расмии ВКД дар ин робита қайд мешавад, ки касоне, ки то 1 декабр шаҳодатномаҳои ронандагии кӯҳна ва рақамҳои давлатии ғайристандартиро иваз намекунанд, ба ҷавобгарии маъмурӣ ҷалб карда мешаванд.
Хотиррасон мешавад, ки ба воҳидҳои бақайдгирию имтиҳонотии БДА-и маҳалли ҷойи зист барои иваз намудани шаҳодатномаи ронандагӣ нусхаи шиноснома, шаҳодатномаи ронандагӣ, маълумотномаи тиббӣ ва барои ивази рақами давлатӣ шиносномаи шахсӣ, шаҳодатномаи бақайдгирии воситаи нақлиёт ва рақами қайди давлатӣ пешниҳод карда мешаванд.
Гуфта мешавад, зимни ивази шаҳодатномаи ронандагӣ барои бланкаи шаҳодатнома – 248 сомонӣ, талони қайди қоидавайронкунӣ -19 сомонӣ, маълумотномаи тиббӣ – 70 сомонӣ ва дар маҷмӯъ 337 сомонӣ маблағ пардохт шуда, арзиши ивази рақами қайди давлатӣ дар маҷмӯъ 426 сомониро ташкил медиҳад: рақами қайди давлатӣ – 210 сомонӣ, шаҳодатномаи бақайдгирии воситаи нақлиёт – 210 сомонӣ ва азназаргузаронии воситаи нақлиёт – 6 сомонӣ.
Қобили зикр аст, ки нимаи соли равон Раёсати БДА ВКД Тоҷикистон изҳор дошта буд, ки ронандагонро доир ба зарурати ивази шаҳодатномаи ронандагӣ ба шаҳодатномаи нави биометрӣ ва рақамҳои давлатии кӯҳна ба рақамҳои нави меъёрӣ аз соли 2014 огоҳ карда истодааст.
Дарҳамон рӯзҳо кормандони БДА бисёре аз ронандагонро боздошта, талаб карда буданд, ки барои доштани рақами кӯҳна ҷарима пардохт кунанд.
Дар Раёсати БДА хотиррасон намуда буданд, ки шаҳодатномаҳои ронандагие, ки 10 сол қабл ё пештар аз он гирифта шудааст, муддати ин вақт корношоям шуда, аксҳои онҳо метавонанд ба симои ҳозираи ронанда мутобиқат накунанд.
«Сабаби дигари ивази шаҳодатномаи ронандагӣ аз ҷониби Тоҷикистон тасдиқ гардидани Конвенсияи Вена оид ба ҳаракат дар роҳ мебошад, ки чунин талаботро пеш мегузорад», – хабар дода буданд дар Раёсати БДА ВКД Тоҷикистон.
