Вазорати адлияи Русия рӯйхати расонаҳоеро нашр кард, ки мақоми "агенти хориҷӣ"-ро гирифтаанд.
Бино ба иттилои сомонаи Бахши хабарии Осиёи Марказӣ бо истинод ба сомонаи вазорати адлияи Русия, "Садои Амрико", радио "Аврупои Озод/Радиои Озодӣ", телевизиони "Настоящее время", бахши тоториву бошқирии Радиои Озодӣ, "Фактограф", лоиҳаҳои "Idel.Реалии", "Қрим.Реалии", лоиҳаи нави бахши русии Радиои Озодӣ "Сибир.Реалии" шомили рӯйхати мазкур шудаанд.
Охири моҳи ноябри соли ҷорӣ дар Русия қонуне қабул шуд, ки бар асоси вай мақомоти ин кишвар ҳақ пайдо карданд, ҳар расонаеро, ки аз берун сармоягузорӣ мешавад, "агенти хориҷӣ" унвон кунанд. Ин гуна расонаҳо вазифадор шуданд, ки дар бораи фаъолияташон ба вазорати адлия ҳисобот диҳанд ва матлабҳояшонро тамғагузорӣ кунанд.
Қарор дар бораи қабули қонуне, ки фаъолияти расонаҳои хориҷиро дар Русия маҳдуд мекунад, баъди он пайдо шуд, ки телевизиони "Русияи имрӯз"-и Москва дар ИМА ҳамчун "агенти хориҷӣ" сабти ном гардид.
Дар Департаменти давлатии ИМА борҳо гуфтанд, ки қонуни Амрико дар бораи агентҳои хориҷӣ аз гузинаи русӣ ба куллӣ фарқ дошта, ба ҳеч ваҷҳ озодии матбуотро маҳдуд намекунад.
Томас Кент, президенти "Радиои Аврупои Озод/Радиои Озодӣ" гуфт, "телевизиони RT дар Амрико тавассути кабел пахш мешавад, дар ҳоле ки Радиои Озодӣ дар Русия аз ин имконият маҳрум аст".
