Қарзи ширкати «Барқи тоҷик» бидуни назардошти қарзҳои аз ҷониби Вазорати молия ҷалбшуда барои амалисозии лоиҳаҳои сармоягузории энергетикӣ соли 2017 ба маблағи 1 млрд. сомонӣ афзуд.
«Қарзи кредитории ширкати «Барқи тоҷик» бидуни созишномаҳои қарзии сармоягузорӣ беш аз 3,7 млрд. сомониро ташкил медиҳад», – хабар медиҳад Вазорати энергетика ва захираҳои оби Тоҷикистон.
Ёдрас мекунем, ки аввали соли гузашта сардори Сарраёсати молияи ширкати «Барқи тоҷик» Рустам Маҷидзода ба рӯзноманигорон иттилоъ дода буд, ки ширкат бидуни назардошти қарзҳои ҷалбшуда 2,7 млрд. сомонӣ қарздор аст.
Аз рӯи натиҷаҳои соли гузашта қарзи ширкат назди нерӯгоҳи Сангтӯда-1» ба 763 млн. сомонӣ (соли 2017 – 110 млн. сомонӣ зиёд шуд) расид.
Ҳамчунин «Барқи тоҷик» ба ҶСК «Ориёнбонк» ва нерӯгоҳи «Сангтӯда-2» низ маблағҳои зиёд қарздор мебошад. Аз андозу маблағҳои харидории ангишту дигар навъи сӯзишворӣ низ қарздориҳо мавҷуданд.
Аввали соли гузашта ширкати «Барқи тоҷик» хабар дода буд, ки ҳаҷми қарзҳои ҷалбшуда барои амалисозии лоиҳаҳои сармоягузорӣ 11 млрд. сомониро ташкил медиҳад.
Ҳамин тариқ, ҳаҷми умумии қарздориҳои ширкати «Барқи тоҷик» аз 14,7 млрд. сомонӣ (беш аз 1,6 млрд. доллар) зиёдтар шуд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
