Соли гузашта дар вилояти Суғд 38 нафар ноболиғон даст ба худкушӣ задаанд, ки нисбат ба соли 2016 – 6 ҳолат зиёдтар аст.
Сардори Раёсати маорифи вилояти Суғд Осим Каримзода зимни нишасти хабарӣ изҳор намуд, ки соли гузашта дар қаламрави вилоят аз ҷониби ноболиғон 145 ҷиноят (соли 2016 – 146 ҷиноят) содир шудааст, ки аз ин шумор 75 қонуншиканӣ (соли 2016 – 81 қонуншиканӣ) ба толибилмони мактабҳои миёна рост меояд.
«Ноболиғон асосан ба ҷиноятҳое чун дуздиву авбошӣ, вайрон кардани қоидаҳои ҳаракат дар роҳ даст задаанд», – гуфт Каримзода.
Сардори Раёсати маорифи вилоят ҳамчунин қайд кард, ки айни замон 223 бинои мактабҳои таҳсилоти умумии вилоят ба таъмир ниёз доранд, ки 13-тои он садамавӣ ва 52-тояш – қисман садамавӣ мебошанд.
«Имрӯз дар қаламрави вилоят 923 мактаби таҳсилоти миёнаи умумӣ амал карда, дар онҳо 517 ҳазору 802 нафар ба таҳсил фаро гирифта шудаанд, – иброз дошт номбурда. – Дар мактабҳо беш аз 37 ҳазор нафар омӯзгорон ба таълими хонандагон машғул буда, ҳамасола шумори хонандагони вилоят 15-20 ҳазор нафар зиёд мешавад».
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
