Нависандаи маъруфи тоҷик Равшани Ёрмуҳаммад, падари адвокати маҳкумшуда Бузургмеҳр Ёров рӯзи 4 март дар манзилаш аз олам даргузашт, хабар дод ба «Азия-Плюс» як манбаъ аз Иттиҳоди нависандагони Тоҷикистон.
Ҷасади адиби 76-соларо дар ноҳияи Ҷалолиддини Балхии вилояти Хатлон, ки зодгоҳаш аст, ба хок супурданд.
Равшани Ёрмуҳаммад китобҳои “Шоҳбузи сафед”, “Қиссаи шаҳри беҷон ё Саргузашти духтари бофанда”, “Гӯркоб”, “Қиссаҳои “Буду набуд”, романи Бармакиён”, қиссаҳои “Тӯфони Нӯҳ” ва “Хоб ва бедорӣ” ва ғайраро таълиф намудааст.
Писари марҳум адвокат Бузургмеҳр Ёров тирамоҳи соли 2015 ба иттиҳоми «қаллобӣ» ва «сохтакории ҳуҷҷатҳо» ба ҳабс гирифта шуд. Ҳабс баъди аз ҷониби Ёров тасмим гирифтан ба ҳимояи ҳуқуқҳои аъзои Ҳизби фаъолияташ дар Тоҷикистон манъшудаи наҳзати исломӣ сурат гирифт.
Баъдан адвокатро боз мувофиқи се моддаи Кодекси ҷиноӣ, аз ҷумла «даъватҳои оммавӣ ба фаъолияти ифротгароӣ» айбдор карданд. Моҳи октябри соли гузашта адвокат ба 23 соли зиндони низомаш шадид маҳкум шуд.
Моҳи марти соли 2017 Суди олии Тоҷикистон Ёровро барои «беҳурматӣ ба суд» зимни суханрониаш дар суд аз рӯи парвандаи якум боз ба муҳлати ду сол аз озодӣ маҳрум кард: ҳангоми сухан гуфтан ӯ аз Абӯалӣ ибни Сино рубоӣ қироат кард, ки ин амалро судя беҳурматӣ донист.
Чанде баъдтар нисбати Бузургмеҳр Ёров ба иттиҳоми қаллобӣ ва таҳқири президенти Тоҷикистон боз ду парвнадаи ҷиноӣ боз шуда, аз рӯи ин моддаҳо ӯ боз ба 3 соли зиндон маҳкум шуд.
Адвокат Бузургмеҳр Ёров дар маҷмӯъ ба 28 соли зиндон махқум шудааст. Бародар ва хоҳараш Ҷамшед ва Хосият Тоҷикистонро тарк карда, дар хориҷи кишвар қарор доранд.
