Муноқиша ва задухӯрди ду гурӯҳи ҷавонон бояд дар қафои маркази савдои «Саодат» доир мегардид.
Бино ба иттилои дафтари матбуоти Раёсати ВКД ҶТ дар шаҳри Душанбе, дар рафти гузаронидани чорабиниҳои оперативӣ-ҷустуҷӯӣ хабари оперативӣ ба даст оварда шуд, ки бегоҳии рӯзи 26 марти соли 2018 дар қафои Маҷмааи тиҷорат ва савдои “Саодат”, воқеъ дар кӯчаи Шамсӣ байни ду гурӯҳи ҷавонон муноқиша ва задухӯрд бо истифода аз силоҳҳои сард пешбинӣ шудааст, ки эҳтимолияти ҷиноятҳои куштор ва расонидани зарари вазнин ба саломатӣ ҷой доранд.
«Бо хабари мазкур кормандони ботаҷрибаи самти оперативӣ сафарбар карда шуда, тахминан соатҳои 18.00 дақиқаи ҳамон рӯз дар мавзеъи муайяншуда, аз таваққуфгоҳи автомашинаҳо 4 нафар ҷавонони бо корд мусаллаҳ, ки бо автомашинаи тамғаи Ниссан-Максима аломати қайди давлатиаш 2441ЕЕ01 омада буданд, дастгир гардида, ба мақомоти милитсияи шаҳри Душанбе дастрас карда шуданд», – омадааст дар хабар.
Гуфта мешавад, аз ҷавонони ба мақомоти милитсияи дастрасгардида 4 адад кордҳои калон, ки бо мақсади ҷиноятсодиркунӣ оварда буданд, мусодира карда шуд.
Қайд мешавад, ки дар идомаи чорабиниҳои оперативӣ-ҷустҷӯӣ кормандони милитсияи шаҳри Душанбе тахминан соатҳои 22.30 дақиқаи ҳамон рӯз дар кӯчаи Шамсӣ (маконе, ки тибқи маълумоти оперативӣ бояд 2 гурӯҳ ҷавонони мусаллаҳ ҷамъ шуда, муноқиша менамуданд) гурӯҳи дигари ҷавонон иборат аз 4 нафар бо силоҳҳои сард мусаллаҳ, ки бо автомашинаи тамғаи “Мерседес-Бенс” рақами давлатиаш 6767AD01 омада буданд, дастгир гардида, ин гуруҳи ҷавонони мусаллаҳ низ ба мақомоти корҳои дохилии шаҳри Душанбе дастрас карда шуданд.
Зимнан зикр мегардад, ки аз ин гурӯҳ низ 2 адад табар, 1 мехкашак, 2 корд, 1 болға ва 1 адад чубдасти оҳанин, ки ба сифати олоти содирнамоии ҷиноят пешниҳодшуда дарёфт ва мусодира карда шудааст
Айни замон нисбати 8 нафар ҷавонони дастрасшуда бо Қарори Суд ҳабси маъмурӣ татбиқ гардида, барои ошкор намудани дигар кирдорҳои ҷиноятии ин гурӯҳҳои ҷавонони гумроҳ гузаронидани маҷмӯи чорабиниҳои оперативӣ-ҷустуҷӯӣ идома дорад.
