Аз охири моҳи феврал то имрӯз 22 парвози ҳавоипаймоҳои «Уралские авиалинии» аз Хуҷанд сурат нагирифт.
Мусофироне, ки ба рӯзҳои 28-29 март билетҳо ба хатсайри ширкати ҳавопаймоии «Уралские авиалинии» аз Хуҷанд ба шаҳрҳои Екатеринбург, Маскав ва Челябинскро доштанд, ба нуқтаи таъинот дар муҳлати муқарраршуда расонида нашуданд.
Интизорӣ мерафт, ки се ҳавопаймо аз шаҳрҳои Русия ба Хуҷанд омада, бо мусофирон бозпас ба Русия парвоз мекунанд, лекин бинобар сабаби ҳал нашудани масъалаи иҷозатномаи парвози ҳавопаймоҳои ширкати «Уралские авиалинии», анҷоми парвозҳо бекор шуд.
Аз Фурудгоҳи байнулмилалии Хуҷанд ба «Азия-Плюс» хабар доданд, ки аз 21 феврал то имрӯз 22 парвози ҳавопаймоҳои «Уралские авиалинии» аз Хуҷанд сурат нагирифт, аз ҷумла 6 парвоз бо хатсайри Краснодар – Хуҷанд – Краснодар, 5 парвоз бо хатсайри Қазон – Хуҷанд – Қазон, 6 парвоз бо хатсайри Челябинск – Хуҷанд – Челябинск, 4 парвоз бо хатсайри Жуковский – Хуҷанд – Жуковский ва 1 парвоз бо хатсайри Уфа – Хуҷанд – Уфа.
Дар намояндагии ширкати «Уралские авиалинии» дар Хуҷанд ба «Азия-Плюс» дар ин робита гуфтанд, касоне, ки ба хатсайрҳои бекоршуда билет харидаанд, метавонанд онҳоро супоранд ё ба дигар хатсайрҳои иҷозашудаи ин ширкат, ки ду маротиба дар як ҳафта бо хатсайрҳои Хуҷанд – Маскав – Хуҷанд ва Хуҷанд – Екатеринбург анҷом дода мешавад, иваз намоянд. Ҳамчунин билетҳоро метавон ба хатсайрҳои дигар ширкатҳои ҳавопаймоӣ низ иваз кард.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
