Эстакадаи сесатҳаи нақлиётӣ дар буриши хиёбонҳои Нусратулло Махсум ва Бобоҷон Ғафуров (маҳаллаи 82-юм) дар муҳлати муқарраршуда ба истифода дода мешавад.
Тавре ба «Азия-Плюс» як манбаъ аз Вазорати нақлиёти ҷумҳурӣ хабар дод, корҳои сохтмони эстакадаи сесатҳа дар доираи амалисозии лоиҳаи «Таҷдиди роҳи автомобилгарди Душанбе – Турсунзода – сарҳади Ӯзбекистон», қитъаи роҳи аз муҷассамаи Абӯалӣ ибни Сино то дарвозаҳои ғарбии Душанбе аввали моҳи июл ба итмом мерасанд.
«Лоиҳаи мазкурро ширкати ширкати «Гурӯҳи сохтмони роҳу пулҳои Синтзян-Бейсин» (Xinjiang Beixin Road & Bridge Group Co, Ltd) -и Чин ба маблағи наздики 25,5 млн. доллар амалӣ месозад. Корҳо аввали моҳи июл оғоз гардида, тибқи ҷадвал аввали моҳи июли соли равон ба анҷом расонида мешаванд», – гуфт маенбаъ дар Вазорати нақлиёт.
Чорсӯи нави сохташаванда аз 3 сатҳ иборат буда, дар сатҳи дуввуми чорроҳа, роҳи давродаврие бунёд мегардад, ки ҳаракати нақлиёт дар он тавассути чароғакҳо идора мешавад. Дар сатҳи сеюм аз самти шарқ ба ғарб купрук, ки дарозиаш 125 метрро ташкил медиҳад, мегузарад. Дар лоиҳаи мазкур сохтмони 4 роҳи зеризаминӣ барои роҳгузарон низ пешбинӣ шудааст.
Ёдрас мекунем, ки аз 26 феврал дар чорроҳаи маҳаллаи Қарияи Боло низ сохтмони эстакадаи сесатҳа дар доираи амалисозии лоиҳаи «Таҷдиди роҳи автомобилгарди Душанбе – Турсунзода – сарҳади Ӯзбекистон», қитъаи роҳи аз муҷассамаи Абӯалӣ ибни Сино то дарвозаҳои ғарбии Душанбе оғоз шуд. Иншооти мазкур аз се сатҳ иборат буда, дар буриши кӯчаҳои хиёбонҳои Исмоили Сомонӣ ва Сино ҷойгир аст.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
