Вакили парлумони Афғонистон аз вилояти Кундуз Инҷинир Камол изҳор намуд, ки ҷангиёни «Толибон», ки дар задухӯрдҳо бо нерӯҳои ҳукумат захмӣ мешаванд, дар дармонгоҳҳои Тоҷикистон муолиҷа мешаванд.
Қушӯнҳои сарҳадии Кумитаи давлатии амнияти миллии Тоҷикистон ин изҳороти вакили афғонро бардурӯғ ва беасос медонад.
«Маълумоте, ки вакили парлумони Афғонистон тариқи шабакаи телевизионии «Ошно» мунташир намуд, дурӯғӣ маҳз аст», – изҳор дошт ба «Азия-Плюс» дар ин робита сардори маркази матбуотии ҚС КДАМ Тоҷикистон Муҳаммад Улуғхоҷаев.
Ба гуфтаи ӯ, ҳаракати Толибон дар Тоҷикистнон созмони террористӣ эътироф шуда, муофиқи қонунҳои кишвар, ҳама гуна робитаҳо бо он манъ аст.
«Душанбеи расмӣ бо Толибон ҳеҷ гуна робита надошт ва надорад ва ин гуфтаҳо кофист», – таъкид дошт котиби матбуотии Қушӯнҳсои сарҳадӣ.
Аммо сиёсатмадори афғон дар мусоҳибаи худ мегӯяд, толибон бо Тоҷикистон робитаҳои зич роҳандозӣ намуда, «захмиёни онҳо дар дармонгоҳҳои Тоҷикистон табобат мегиранд».
«Робитаи Толибон бо Душанбеи расмӣ имрӯз пӯшида нест, аз он аксари сокинони минтақаҳои ҳаммарз бо Тоҷикистон, ки зери назорати Толибон аст, воқифанд», – изҳор доштааст вакили парлумони Афғонистон.
Сиёсатмадори афғон итминон медиҳад, ки Толибон имрӯз бо кишварҳои ҳамсоя, минтақа ва ҷомеаи байнулмилалӣ робитаҳои зичу дӯстона дорад.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
