Раиси кумитаи Маҷлиси намояндагон оид ба иқтисод ва молия Шариф Раҳимзода ва аъзои кумитаи мазкур бо намояндагони Хазинаи Байналмилалии Асъор (ХБА), ки бо сафари корӣ дар Тоҷикистон қарор доранд, мулоқот кард.
Бино ба иттилои дафтаи матбуоти палатаи поёнии парлумони ҷумҳурӣ, дар мулоқот масоили марбут ба ҳолати кунунӣ ва дурнамои ҳамкориҳои молиявию иқтисодии Тоҷикистон бо Хазинаи Байналмилалии Асъор мавриди баррасӣ қарор дода шуд.
Таъкид гардид, ки Ҳукумати Ҷумҳурии Тоҷикистон дар ҳамдастӣ бо ташкилоту идораҳои молиявии байналмилалӣ, аз ҷумла хазинаи мазкур дар татбиқи сиёсати иқтисодӣ ба нишондиҳандаҳои назаррас ноил гардидааст.
Зимни суҳбати пурмуҳтаво бештар ба масъалаҳои гуногуни вазъи ҷаҳони муосир, нақшаю дурнамои марбут ба рушди оянда ва кам кардани таъсири манфии омилҳои берунӣ ба иқтисодиёти Тоҷикистон таваҷҷуҳ зоҳир карда шуд.
Шариф Раҳимзода ба намояндагони Хазинаи Байналмилалии Асъор барои кӯмак ва мусоидати холисонаашон дар рушди иқтисодии мамлакат, алалхусус дар солҳои баъди истиқлолияти давлатии Ҷумҳурии Тоҷикистон ва дастгирии ҳамаҷонибаашон дар раванди иҷрои барномаҳои гуногуни иқтисодӣ арзи сипосу қадрдонӣ кард.
«Мо мулоқоти имрӯзаро,-таъкид намуд Шариф Раҳимзода,- идомаи мантиқии таҳкими ҳамкориҳои Ҳукумати Ҷумҳурии Тоҷикистон бо Хазинаи Байналмилалии Асъор ва омили вусъатбахши дигаргунсозиҳои иқтисодии кишвари худ меҳисобем.
Шариф Раҳимзода ҳамчунин аз тадбирҳои Ҳукумати Ҷумҳурии Тоҷикистон дар роҳи паст кардани шиддати таъсири омилҳои берунӣ ба иқтисодиёт ва тақвият бахшидани рақобатпазирии иқтисоди миллӣ ёдовар шуда, изҳори боварӣ намуд, ки дар оянда низ шарикони рушди Тоҷикистон дар доираи афзалиятҳои стратегии рушд бо роҳи дастгирии буҷети давлатӣ ва соҳаҳои иҷтимоӣ дар ҳалли мушкилоти мавҷудаи иқтисодию молиявӣ нақши муносиб мегузоранд.
Ҳамчунин дар мулоқот изҳори боварӣ карда шуд, ки тавассути муколамаҳои доимии сатҳи олӣ робитаҳои дуҷонибаи Тоҷикистону Хазинаи Байналмилалии Асъор дар ҳама самтҳо мазмуну мундариҷаи навро касб менамояд.
