Маоши миёнаи номиналӣ дар Тоҷикистон аз оғози сол ба андозаи 10,5 фоиз афзуда, ба аввали моҳи апрел музди меҳнати миёна дар Тоҷикистон 1 ҳазору 228 сомонӣ (136 доллар)-ро ташкил дод.
Бино ба маълумоти Агентии омори назди президенти ҶТ, моҳи март ҳаҷми музди меҳнати коргарони кирошуда 1228,08 сомониро ташкил дода, дар муқоиса бо моҳи январ 116 сомонӣ (қариб 13 доллар) зиёд шуд.
Моҳи март маоши аз ҳама зиёдтар дар бахши миёнаравии молиявӣ (3191,19 сомонӣ) ва саноати кӯҳкорӣ (2385,79 сомонӣ) ва аз ҳама камтарин дар соҳаи кишоварзӣ (532,77 сомонӣ) пардохт шудааст.
Аз лиҳози минтақавӣ моҳи март музди меҳнати миёнаи баландтарин дар Душанбе – 1934,24 сомонӣ ва пасттарин дар вилояти Хатлон – 915,53 сомонӣ ба қайд гирифта шудааст. Маоши ҳадди ақал дар Тоҷикистон айни замон ба 400 сомонӣ баробар аст.
Тӯли 27 соли соҳибистиқлолӣ аз рӯи сатҳи музди меҳнати миёна Тоҷикистон байни кишварҳои узви ИДМ зинаи охирро ишғол мекунад.
Соли гузашта музди меҳнати миёнаи моҳонаи баланд дар Русия (600 доллар) ба қайд гирифта шуд, ки тибқи маълумоти гуногун, ҳар як ҳаштум тоҷикистонӣ дар ин кишвар қарор дорад.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
