Раисони шӯроҳои маҳаллӣ ба маблағи умумии беш аз 40 млн. сомонӣ (4,3 млн. доллар) садақаи фитр ҷамъоварӣ намуданд, хабар дод ба “Азия-Плюс” як манбаъ аз Кумитаи умури дини ҷумҳурӣ.
“Зиёда за 40 млн. сомонӣ маблағи умумии ҳамаи хайрия мебошад, ки ба он ҳам пули нақд ва ҳам дигар навъҳои хайрия дохил мешаванд. Масалан, касе ба маблағи 10 ҳазор сомонӣ дар маҳалла корҳои ободкунӣ гузаронд, дигарӣ ба оилаи эҳтиёҷманд бо маҳсулоти хӯрокворӣ ёрӣ расонд”, – гуфт ҳамсуҳбат.
Бино ба гуфтаи манбаъ, пулҳои нақд, ки аз ҷониби шӯроҳои маҳаллӣ ҷамъоварӣ шуд, байни оилаҳои камбизоат тақсим шуда, ҳамчунин барои таъмири роҳҳо ва хатҳои таъмини оби нӯшокӣ истифода шуданд.
“Тақсими воситаҳоро комиссияи махсус аз ҳисоби имомхатибон ва фаъолони деҳот зери назорат доштанд”, – иброз дошт манбаъ.
Ёдрас мекунем, ки Шӯрои уламои Тоҷикистон соли равон ҳаҷми садақаи фитрро барои як кас 5 сомонӣ дар тамоми моҳи Рамазон муқаррар намуд. Пеш аз Иди Рамазон Кумита изҳор дошт, ки сокинони Тоҷикистон бо хоҳиши худ садақаи фитрро метавонанд ба раисони шӯроии маҳаллаҳои худ ё имомхатибон супоранд.
Дар Кумита зикр карда буданд, ки пешниҳоди ба раисони маҳалла ё имомхатибон супурдани садақаи фитр аз ҷониби ҳукумат расидааст, ки баъди муроҷиати сокинони ҷумҳурӣ, ки намедонистаанд садақаи фитрро ба кӣ диҳанд, рӯйи кор омадааст.
Ба назар гирифта шудааст, ки раисони маҳалла ва имомхатибон сокинони маҳалли худро хуб шинохтаву аз вазъи зиндагиашон огаҳанд ва рӯйхати шахсони камбизоату эҳтиёҷмандро дар даст дошта, ба онҳо кумак мекунанд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
