Раиси вилояти Суғд Раҷаббой Аҳмадзода бо ҷараёни корҳо дар майдони Парчами давлатӣ дар шаҳри Бӯстон шинос шуд.
Раиси вилоят аз сураъати начандон хуби корҳои сохтмонӣ норозигӣ изҳор намуда, дастур дод, ки ситод таъсис дода шуда, корҳои сохтмон тезонида ва шумори сохтмончиён зиёд карда шавад.
Майдони Парчами давлатӣ дар шаҳри Бӯстон 2 гектарро фаро гирифта, дар марказаш бо баландии 50 метр пояи Парчами давлатӣ гузошта мешавад, хабар доданд ба “Азия-Плюс” аз мақомоти шаҳрдории Бӯстон.
Бино ба иттилои манбаъ, бари парчам- 7 ва дарозиаш – 14 метрро ташкил хоҳад дод. Қаламрави майдонро се фаввора, гулгашту роҳравҳо ва замини сарсабзу гулпӯш ва буттаву ниҳолҳои ороишӣ зебу оро хоҳанд дод.
Дар доираи корҳои ободонӣ дар шаҳри Бӯстон ба ифтихори 30-юмин солгарди ҷашни Истиқлолияти давлатӣ сохтмони 150 иншооти гуногуни таъиноти иҷтимоӣ ва маишӣ ба нақша гирифта шудааст.
Айни замон корҳои таъмири асосӣ ва навсозии боғи марказии шаҳрии фарҳангу истироҳати ба номи Садриддин Айнӣ ҷараён дорад. Қаламрави боғ 7 гектарро ташкил дода, дар он фаввораву гулгаштҳо сохта мешаванд. Дар боғ аттраксионҳои муосир насб мешавад. Ҳамчунин дар боғ муҷассамаи нави Садриддин Айнӣ гузошта мешавад.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
