Дар остонаи ҷашни Рӯзи истиқлолияти давлатии Тоҷикистон дар қаламрави Вилояти Мухтори Кӯҳистони Бадахшон нахустин дармонгоҳи хусусӣ боз мешавад.
Тавре ба “Азия-Плюс” як манбаъ аз дастгоҳи раиси ВМКБ хабар дод, ин дармонгоҳ аз ҳисоби воситаҳои соҳибкорзани маҳаллӣ Шарофат Ватаншоева сохта шудааст.
Бинои маркази нави тиббӣ аз 6 ошёна иборат буда, дар он 11 ҳуҷраи табобати беморон, 8 кабинети ташхиси беморӣ ва кабинетҳо барои дорусозон мавҷуд аст.
Дар дармонгоҳи нав шуъбаҳои гуногуни ташхис ва муолиҷаи беморон фаъолият намуда, он бо таҷхизоти навтарин, ки аз Русия ва Аврупо харидорӣ шудааст, таъмин мебошад.
Манбаъ дар бораи маблағи сарфшуда барои сохтмни дармонгоҳ маълумоти саҳеҳ надода, танҳо изҳори итминон кард, ки баъди оғози фаъолияти он шумори сокинони ВМКБ, ки барои ташхису табобат ба Душанбе мераванд, бамаротиб камтар хоҳад шуд.
Тибқи маълумоти хадамоти матбуоти сарвари давлат, айни замон дар ҷумҳурӣ 681 муассисаи хусусии тиббӣ, аз ҷумла 382 муассиса бо мақоми шахси ҳуқуқӣ ва 55 филиал, инчунин, 301 муассисаи марбут ба шахсони воқеӣ фаъолият мекунад. Дар чунин муассисаҳо 1600 нафар табибон ва 1500 нафар кормандони миёнаи тиб кор мекунанд. Имрӯз дар мамлакат 58 беморхонаи хусусӣ, 22 маркази ташхис, 69 озмоишгоҳ, 4 маркази дорусозӣ ва зиёда аз 2300 дорухона таъсис дода шудааст.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
