Вазорати корҳои хориҷии Туркманистон аз изҳороти сафири Тоҷикистон дар Ӯзбекистон Содиқ Ашӯрбойзода дар мавриди мавқуф гузоштани сохтмони роҳи оҳани Туркманистон – Афғонистон – Тоҷикистон “то вақтҳои беҳтар” дар тааҷҷуб аст.
“Вазорати корҳои хориҷии Туркманистон ба ҷониби Тоҷикистон дар робита ба изҳороти сафири Тоҷикистон дар Ӯзбекистон Содиқ Ашӯрбойзода дар мавриди “то рӯзҳои беҳтар мавқуф гузоштани” сохтмони роҳи оҳани Туркманистон – Афғонистон – Тоҷикистон нофаҳмӣ изҳор мекунад”, – омадааст дар маълумоти сомонаи расмии Вазорати корҳои хориҷии Туркманистон.
Қайд мешавад, ки шарҳу тавзеҳҳои ҷониби Туркманистон оид ба изҳороти мазкур бо тартиби расмӣ ба маълумоти ВКХ Тоҷикистон расонида шудааст.
Рӯзи 20 сентябр дар мусоҳиба ба нашрияи “Коммерсант” оид ба масъалаи рушди долонҳои транзитии нақлиётӣ дар Ӯзбекистон Ашӯрбойзода зикр кард, ки беҳбуди муносибатҳо бо Ӯзбекистон Тоҷикистонро водор намуд, ки ақидаи сохтмони роҳи оҳан аз Туркманистон то Тоҷикистон тариқи шимоли Афғонистонро “то вақтҳои беҳтар мавқуф гузорад.
Дастрас кардани шарҳи масъала аз Вазорати корҳои хориҷии Тоҷикистон ба “Азия-Плюс” муяссар нашуд.
Охири соли 2015 Бонки осиёгии рушд изҳор дошт, ки ба як муддати номуайян аз дастгирии лоиҳаи сохтмони роҳи оҳани Тоҷикистон – Афғонистон – Туркманистон ба иллати ноамнии вазъ дар қаламрави Афғонистон худдорӣ меварзад.
Қобили зикр аст, ки қаблан БОР барои таҳияи тарҳи фанниву иқтисодии лоиҳаи ин роҳи оҳани оянда 9 млн. доллари ИМА воситаҳои грантӣ ҷудо карда буд.
Ёддошт дар бораи сохтмони роҳи оҳани Тоҷикистон – Афғонистон – Туркманистон моҳи марти соли 2013 аз ҷониби сарони ин се кишвар ба имзо расид. Маблағгузорӣ ба амалисозии лоиҳаро Бонки осиёгии рушд амалӣ карданист.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
