Ивази раиси вилояти бузургтарини Тоҷикистон – Хатлон, ки санаи 14 январ бо фармони президенти мамлакат Эмомалӣ Раҳмон сурат гирифт, барои аксари коршиносон ва сиёсатшиносон гайримунтазира буд. Барои бисёриҳоро ин далел ногаҳонӣ буд, ки бори нахуст тӯли солҳи соҳибистиқлолӣ зодаи шимоли кишвар роҳбари вилояти ҷануби ҷумҳурӣ таъин шуд.
Сарвари давлат раиси вилояти Хатлонро иваз намуда, ба ҷойи ӯ зодаи вилояти Суғд, Қурбон Ҳакимзодаи 53-соларо, ки қаблан ба ҳайси раиси Кумитаи давлатии идораи замин ва геодезии Тоҷикистон ифои вазифа мекард, раиси вилояти Хатлон таъин кард.
Ба ақидаи сиёсатшиноси тоҷик Абдуғанӣ Мамадазимов, таъини Қурбон Ҳакимзода ба мансаби раиси вилоятиХатлон се сабаб дорад.
Аввал, сиёсатшинос бар ин назар аст, ки собиқ раиси вилоят “бо кори пастифати илмиаш натанҳо худ, балки як зумра беҳтарин менеҷерҳоро дар сохторҳои ҳукумат беобрӯ ва бадном кард”. Ёдрас мекунем, ки пойгоҳи "Диссернет” раиси вилояти Хатлон Давлатшо Гулмаҳмадзодаро ба асардуздӣ (плагиат) айбдор кард. "Диссернет” дар рисолаи илмии Давлатшо Гулмаҳмадов ки 12 декабри соли 2009 дар мавзӯи "Управление земельными ресурсами трудоизбыточного региона в условиях аграрной реформы (на материалах сельского хозяйства Таджикистана)” ҳимоят карда, унвони номзади илмҳои иқтисодиро ба даст овардааст, мавридҳои хеле зиёди бидуни зикри манбаъ рӯбардор кардани рисолаҳои дигаронро ошкор намуд.
Он замон ёвари раиси вилояти Хатлон ба рӯзноманигорон дар ин робита изҳор намуда буд, ки айбгузориҳои “Диссернет” асоси воқеӣ надоранд.
“Чизе, ки коршиносон навиштаанд, бардурӯғ ва туҳмат аст. Баъди 9 сол шахсро ба асардуздӣ айбдор кардан – кори бадхоҳон аст”, – гуфта буд ӯ. Худи Гулмаҳмадов аз шарҳи маводи нашркардаи “Диссернет” худдорӣ варзид.
Дуюм, ба ақидаи сиёсатшинос, сари раҳбарияти вилоят омадани агроном-геодезисти варзида, ки ҳамаи камбуд ва захираҳои истифоданашудаи дохилиро аз наздик медонад, гувоҳи он аст, ки раҳбарияти ҷумҳурӣ сари аз гардиш берун мондани майдони бузурги заминҳои кишоварзӣ дар вилояти серҳосили кишвар махсус нигарон аст.
“Акнун раҳбарияти нави вилоятро лозим аст, ки дар фурсатҳои кӯтоҳтарин даҳҳо ҳазор гектар заминҳои киштро аз нав ба гардиш дарорад”, – қайд кард ӯ.
Сеюм, коршинос мегӯяд, таъини зодаи як вилоят ба мансаби раиси вилояти минтақаи дигар гувоҳи он аст, ки раҳбарияти сиёсии Тоҷикистон “ба шикастани дидгоҳи маҳалливу музофотӣ дар зеҳни мансабдорони минтақавӣ оғоз намуда, аз риояи адаб ба салоҳиятнокии баланд дар таъини мансабдорони ноҳия ва вилоятҳо мегузарад”.
Бо мо дар Telegram, Facebook, Instagram, Viber, Яндекс.Дзен, OK ва Google Новости бимонед.
