Соли 2018 дар Фурудгоҳи байнулмилалии Душанбе (ФБД), беш аз 1,2 ҳазор ҳолатҳои ба таъхир гузошта шудани парвози ҳавопаймоҳо ба қайд гирифта шудааст.
Бино ба маълумоти дафтари матбуоти ФБД, сабаби асосии таъхири парвозҳо дер омадани ҳавопаймо аз фурудгоҳи макони парвоз буда, соли гузашта 925 чунин ҳолатҳо ба вуҷуд омадааст.
Ғайр аз ин, сабаби таъхири парвоз дар 117 ҳолатҳо – ба дахолати ширкатҳои ҳавопаймоӣ (иваз кардани ҳавопаймо ва экипаж, бақайдгирии иловагӣ ва супориши намоянда, тағйирёбии парвозҳо ва ғайра), 49 ҳолат – ба номусоидии обу ҳаво ва 18 ҳолат – ба ҷорӣ будани реҷа рост омадааст.
Гуфта мешавад, соли 2018 ҶСК «Фурудгоҳи байналмилалии Душанбе” ба зиёда аз 1,3 млн. нафар мусофирон хизмат расонидааст, ки нисбат ба соли гузашта 1,6% ёхуд 20,6 ҳазор нафар мусофир зиёдтар мебошад.
“Соли 2018 миқдори умумии бор ва почтаи аз ҷониби терминали боркашонии фурудгоҳи байналмилалии Душанбе қабулгардида ва интиқолдодашуда беш аз 2,5 ҳазор тоннаро ташкил дод, ки назар ба соли гузашта 2,0% ё худ 50,0 тн. зиёдтар аст”, – омадааст дар маълумоти фурудгоҳ.
Қайд мешавад, ки парвозҳо дар Фурудгоҳи байналмилалии Душанбе аз ҷониби 13 ширкати ҳавопаймоӣ, аз ҷумла, 4 ширкати ҳавопаймоии мамлакатҳои хориҷи дур (“Turkish Airlines», “Kam air», “Хатҳои ҷанубии Хитой”, FlyDubai ), 7 ширкати ҳавопаймоии мамлакатҳои ИДМ («Сибир”, “Ют Эйр”, “Урал” – Россия, “Авиатрафик” – Қирғизистон, “Эйр Астана”, СКАТ – Қазоқистон, “Ўзбекистон ҳаво Йуллари”-Ўзбекистон) ва 1 ширкати ватании «Сомон Эйр» ба амал оварда мешаванд.
Қобили зикр аст, ки ширкати миллии ҳавопаймоии Тоҷикистон – Тоҷик Эйр” аз оғози соли равон парвозҳоро ба ҳамаи самтҳо қатъ намуд.
Зимнан зикр мегардад, ки аз фурудгоҳи байналмилалии Душанбе ҳавопаймоҳо ба 13 шаҳрҳои Федератсияи Россия, инчунин ба Қирғизистон, Қазоқистон, Ўзбекистон, Олмон, Хитой, Афғонистон, Туркия, Ҳиндустон, Аморати Муттаҳидаи Араб ва Эрон парвоз мекунанд. Миқдори умумии хатсайрҳои доимии ширкатҳои ҳавопаймоии мазкур дар як рўз 15 ададро ташкил медиҳад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
