Аз замони пайдо шудани алоқаи мобилӣ дар Тоҷикистон дар бораи зарару фоидаи телефонҳои мобилӣ (ҳамроҳ), пойгоҳҳои заминавии онҳо ва ба сурати умум доир ба алоқа баҳсу мунозираҳо оғоз ёфтанд. Ва дар ниҳояти кор бар болои ҳамаи ваҷҳу далелҳо хулосае ғолиб омад, ки мавҷҳои электромагнитӣ ба бемориҳои саратон, рӯҳӣ ва дигар касалиҳо боис мегарданд.
Собиқадори бахши алоқаи радио Мақсуд Турсунзода дар мусоҳиба ба “Азия-Плюс” дар бораи нозукиҳои мавҷҳои электромагнитӣ маълумот дод.
Мақсуд Турсунзода ҳанӯз овони мактабхонӣ, дар синфи 8-ум ба радиоэлектроника таваҷҷуҳ зоҳир намуда, то ҳол ин корро идома медиҳад. Дар боми хонаи ӯ пойгоҳи заминавӣ (базовая станция) насб шуда, дар ҳуҷраи ӯ барои таҳқиқи озмоишии таҷҳизот тамоми асбобу дастгоҳ ва лавозимоти зарурӣ мавҷуд аст.
– Ман ҳозир 78-сола буда, аз мавҷҳои электронӣ ҳеҷ зарареро ҳис намекунам. Ва бемориҳое, ки ман ҳозир дорам, дақиқан аз мавҷҳои электромагнитӣ нест, – мегӯяд Мақсуд Турсунзода.
Мақсуд Мирзоевич, писари Мирзо Турсунзодаи машҳур, ҳикоя мекунад, ки байни лирика ва физика интихоб дошта, физика ғолиб ва таваҷҷуҳаш бештар ба радиотехника ҷалб шудааст. Ҳамон вақт ӯ пойгоҳи радио сохта, дар мусобиқаҳо иштирок ва ба гунаи мисол соли 1958 дар мусобиқаҳои пионерӣ дар Иттиҳоди Шӯравӣ (СССР) зинаи аввалро ишғол намудааст.
– Назди ман ҳамеша дастгоҳи фиристанда меистод,ки мавҷҳои электромагнитӣ меафканд, лекин ман то ҳол зиндаам ва агар кадом беморие ҳам дошта бошам, ба ҳеҷ ваҷҳ бо ин сабаб нест, – мегӯяд ӯ.
Овозаҳои зарар доштани мавҷҳои электромагнитӣ бо пайдо шудани телефонҳои мобилӣ рӯйи кор омаданд.
– Ҳарчанд нурафкании электромагнитӣ дар ҳама ҷо вуҷуд дорад, масалан дар дастгоҳи барқии маъмулӣ низ, лекин ҳамааш ба дарозии мавҷ вобаста аст: чӣ қадре мавҷҳо кӯтоҳ бошанд, зарар зиёдтар аст. Мавҷҳои пойгоҳҳои заминавӣ дароз аст, аз ин рӯ, зиёнашон низ камтар мебошад, – шарҳ медиҳад Мақсуд Мирзоевич.
Мутахассис мегӯяд, ба ӯ лозим омадааст ба одамон исбот намояд, ки таъсири алоқаи мобилӣ ба инсон ҳадди ақал аст ва он ба тарзе коркард мешавад, ки ба солимии инсон зиёнаш камтар расад.
– Ман дастгоҳе дорам, ки афканиши нурҳоро нишон медиҳад, назди пойгоҳи заминавӣ (дастгоҳ) чизеро нишон намедиҳад. Агар пойгоҳи заминавӣ дар бом насб шуда бошад, пас бом ҳамаи нурафканиҳоро бозмедорад”, – изҳор мекунад М.Турсунзода.
Ӯ дастгоҳи махсусеро нишон медиҳад, ки сатҳи микроамперро нишон медиҳад, дастгоҳро ба телефони нурафкани мавҷҳои радио мегузорад ва дар оинаи дастгоҳ ақрабак базӯр ба 10 микроампер мерасад. Ин комилан сатҳи ночизи мавҷафканӣ мебошад.
– Вақте мо дар бораи нурафканиҳои мавҷҳои электромагнитӣ сухан мегӯем, одамон бештар аз гирифторӣ ба бемории саратон метарсанд. Лекин вақте ки алоқаи мобилӣ вуҷуд надошт, он замон низ одамон ба бемории саратон гирифтор мешуданд ва хеле зиёд ҳам. Ба ҳама маълум аст, ки нурафкании офтоб ба саломатии инсон таъсири зиёд дорад. Пас мо акнун аз офтоб ҳам пинҳон шавем? Ба одами солим офтоб зарар намерасонад, ба шахси фишори хунаш баланд (гипертоник) он зарар дорад, – илова намуд Мақсуд Турсунзода.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
