Ширкатҳои ҳавопаймоии Қазоқистону Тоҷикистон шумори хатсайрҳои ҳавоӣ байни кишварҳоро зиёд мекунанд, хабар медиҳад маҷаллаи интернетии “Власть”-и Қазоқистон бо истинод ба Кумитаи авиатсияи граждании ин кишвар.
Гуфта мешавад, бо дастури сарони кишварҳо дар Душанбе бо иштироки намояндагони ширкатҳои ҳавопаймоии Air Astana, SCAT, Tajik Air ва Somon Air гуфтушуниди мақомоти марбутаи авиатсионии Қазоқистону Тоҷикистон доир гардиданд.
“Аз рӯи натиҷаҳои гуфтушунид протокол ба имзо расид, ки мувофиқи он ширкатҳои ҳавопаймоии ҳурду кишвар ба зиёд кардани шумори хатсайрҳои ҳавоӣ байни давлатҳо то ба 32 адад дар як ҳафта имкон пайдо карданд”, – гуфта мешавад дар хабар.
Аз ҷумла, дар хатсайри Алмаато – Душанбе шумори хатсайрҳо то 12 адад, Остона – Душанбе – то 6 адад ва хатсайрҳои боқимонда байни шаҳрҳои Остона, Чимкент, Тараз ва Душанбе, Хуҷанд, Бохтар ва Кӯлоб – то 14 адад дар як ҳафта зиёд карда шуд.
Зимнан зикр мегардад, ки бо мақсади рушди ҳамлу нақли мусофирон тариқи Қазоқистон масъалаи ифтитоҳи алоқаи ҳавоии мустақим байни фурудгоҳҳои минтақавии Қазоқистону Тоҷикистон мавриди баррасӣ қарор дорад.
“Айни замон бар асоси тавофуқҳои ҳосилшуда ширкатҳои ҳавопаймоии Қазоқистон ният доранд, ки шумори хатсайрҳои мунтазам байни шаҳрҳои Остона, Алммато ва Душанберо дар мавсими парвозҳои баҳору тобистон зиёд кунанд”, – хабар додаанд дар Кумитаи авиатсияи гражданӣ.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
