Шаби 11 март дар ду бозори бузурги шаҳри Маскав рейдҳо гузаронида шуда, дар ҷараёни он даҳҳо нафар муҳоҷирон боздошт шуданд.
Мақомоти пулиси Маскав дар маҷмааи савдои “Москва” дар Люблино ва бозори яклухтфурӯшии “Садовод” санҷиш доир намудааст, хабар медиҳад “Интерфакс”.
Рейди кормандони пулис соати 3-и шаби 11 март оғоз гардидааст. Ба гуфтаи манбаи “Интерфакс”, баргузории санҷишҳо ба муноқишаҳои рухдода байни муҳоҷирон рӯзҳои истироҳати ҳафтаи гузашта вобаста буда метавонад. Ҳамчунин зикр шудааст, ки дар қаламрави бозорҳо шояд ширкатҳои бо асъори крипто сарукордоша ҷустуҷӯ мешуданд.
Бино ба маълумоти шабакаи телеграми Mash, рейд ба маркази савдои “Москва” ба ҷанҷоли дастаҷамъии рӯзи 7 март бо истифода аз корду силоҳи оташфишон иртибот дошта, дар бозори “Садовод” рейди маъмулии санҷишӣ доир гардидааст.
Тибқи иттилои манбаъ, даст доштани муҳоҷирони боздоштшуда дар содир шудани як қатор ҷиноятҳо ва ҳамчунин риояи тартиботи будубоши онҳо дар Русия мавриди санҷиш қарор дода шудааст.
Мувофиқи баъзе маълумот, дар бозорҳои “Садовод” ва “Люблино” то 4-5 ҳазор нафар муҳоҷирони тоҷик машғули коранд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
