Раиси вилояти Хатлон Қурбон Ҳакимзода баъди шиносоӣ бо шароити кори идораи телевизион ва радиои вилоят ваъда дод, ки баҳри беҳбудии вазъи телевизион як миллион сомонӣ ҷудо хоҳад кард.
Қурбон Ҳакимзода субҳи 11 – март ба идораи телевизион ва радиои вилоят ташриф оварда, аз шароити кории журналистон, ҳолати техникӣ ва намояндагиҳои шабакаҳои ҷумҳуриявӣ, ки дар ҳамин бино ҷойгиранд, дидан кард.
Ӯ аз ҳолати идораи телевизион ва радиои вилоят изҳори нигаронӣ намуда, ваъда кард, ки барои беҳбуд бахшидан ба кори ин идора 1 миллион сомонӣ ҷудо мекунад.
– Утоқҳои кории рӯзноманигорон, толору студияҳои телевизион ва радио, техника куҳнаю фарсуда шудаанд. Ба хулосае омадам, ки барои харидории таҳҷизоти замонавӣ ба идораи телевизион ва радиои вилоят 750 ҳазор сомонӣ, барои намояндагиҳои шабакаҳои ҷумҳуриявӣ 250 ҳазор сомонӣ ва дар маҷмуъ 1 миллион сомонӣ аз буҷаи вилоят ҷудо карда шавад,-гуфт Қурбон Ҳакимзода.
Ӯ инчунин зикр намуд, ки бо роҳбарияти Кумитаи давлатии телевизион ва радио суҳбат карда, аз онҳо хоҳиш менамояд, ки барои хуб кардани шароити кории идораи телевизион ва радиои вилояти Хатлон саҳми худро гузоранд.
Қурбон Ҳакимзода зимни сухани табрикиаш дар ҷамъомади тантанавӣ бахшида ба “Рузи матбуоти тоҷик” аз вазъи расонаҳои шаҳрию ноҳиявӣ ва адади нашри онҳо низ нигаронӣ кард.
Ӯ гуфт, ки роҳбарони шаҳру ноҳияҳо ба расонаҳои маҳалии худ кам аҳамият медиҳанд, аз ин сабаб, теъдоди нашри газетаҳои маҳаллӣ хеле кам аст.
– Теъдоди нашри баъзе аз газетаҳо 500 – 600 адад аст. Дар ҳоле, ки аҳолии ин шаҳру ноҳияҳо 80 – 100 ҳазор нафар мебошанд,-зикр намуд раиси вилоят.
Қурбон Ҳакимзода таъкид намуд, ки минбаъд зимни сафарҳояш ба шаҳру ноҳияҳои вилоят аз идораи нашрияҳои маҳаллӣ дидан менамояд ва рушди ин соҳаро зери назорат мегирад.
Раиси вилоят аз журналистони маҳаллӣ даъват намуд, ки маводҳои таҳлилию танқидии асоснок омода намоянд. Дар чунин ҳолат, хонанда низ пайдо мешавад. Аз журналистони телевизиони маҳаллӣ хоҳиш намуд, ки раисони шаҳру ноҳияҳоро ба барномаҳо даъват кунанд ва ба шаҳрвандон имкон диҳанд, ки ба мансабдорони маҳаллӣ саволҳояшонро ироя намоянд.
Ҳамчунин, Қурбон Ҳакимзода ба ғолибони озмунии вилоятии “Нерӯи сухан” туҳфаҳои хотиравӣ тақдим намуд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
