Сокинони шаҳри энергетикҳои тоҷик – Норак наздики 10 ҳазор нафар меҳмононро дар хонаи худ қабул мекунанд, ки санаи 20 март ҳамроҳи Президенти Тоҷикистон Эмомалӣ Раҳмон ба ҷашни Наврӯз ба ин ҷо ташриф хоҳанд овард, хабар дод ба “Азия-Плюс” як манбаъ аз дастгоҳи раиси шаҳри Норак.
Бино ба иттилои манбаъ, ин ташаббус аз ҷониби мақомоти ҳокимияти давлатии маҳаллӣ роҳандозӣ шуда, аз ҷониби аксрияти аҳолии шаҳри Норак дастгирӣ ёфтааст.
“Норакиҳое, ки ихтиёрӣ ба қабули меҳмонон дар хонаашон ва оростани дастурхон барои онҳо розӣ шуданд, таом ва нуқлу навои рӯи дастурхонро мувофиқи салоҳдиди худ интихоб карда метавонанд”, – илова карданд дар мақомоти шаҳрдории Норак.
Қобили зикр аст, ки соли 2018 шумори аҳолии шаҳри Норак 59,3 ҳазор нафарро ташкил дода, 30 ҳазор нафарашон муқими шаҳр ва боз ҳамин миқдор дар деҳаҳои тобеи шаҳр зиндагӣ мекарданд.
Президенти Тоҷикистон Эмомалӣ Раҳмон санаи 20 март ба шаҳри Норак ташриф оварда, дар чорабиниҳои идона бахшида ба ҷашни Наврӯз дар ин шаҳр ширкат меварзад. Ба ин муносибат бо иштироки устодони санъати ҷумҳурӣ дар майдони марказии шаҳр намоиши тетрикунонишуда баргузор мегардад.
Аввали моҳи феврал муҷассамаи доҳии пролетариати ҷаҳон Владимир Ленин аз майдони марказии шаҳри Норак барканда шуд. Тибқи нақшаи мақомоти шаҳрдорӣ, ба ҷойи он то ҷашни Наврӯз муҷассамаи Исмоили Сомонӣ гузошта мешавад.
Мақомоти шаҳрдории Норак дар ин маврид мегӯяд, муҷассамаи Ленин ба Боғи фарҳангу фароғати шаҳр кӯчонида хоҳад шуд.
Ҳамчунин зимни ин сафари кории худ ба шаҳри Норак Президенти Тоҷикистон Эмомалӣ Раҳмон ба корҳои таъмиру навсозии нерӯгоҳи барқи обии Норак ҳусни оғоз мебахшад. Дар назар аст, ки Сарвари давлат бо намояндагони ширкате, ки ба ин корҳо машғул мешавад, мулоқот барпо мекунад.
Тендери байнулмилалӣ оид ба корҳои таъмиру навсозии нерӯгоҳи Норак (марҳилаи аввал) охири моҳи августи соли 2017 эълон шуда буд. Он замон ширкати “Барқи тоҷик” байни се иштирокии тендер гурӯҳи ширкатҳои ANDRITZ-ро интихоб намуд, ки дафтари асосии кориаш дар Австрия воқеъ аст.
Бино ба маълумоти ин ширкат, барои анҷоми корҳои таъмиру навсозии нерӯгоҳи Норак беш аз 120 млн. доллар маблағ сарф шуда, иқтидори нерӯгоҳ, ки айни замон 3 ҳазор МВт-ро ташкил медиҳад, баъди ба охир расидани корҳо 12% меафзояд.
Охири соли 2017 барои амалисозии лоиҳаи “Таъмиру навсозии нерӯгоҳи барқи обии Норак, марҳилаи 1” ҳамаи маблағи зарурӣ – 350 млн. доллар дарёфт шуд. Ассотсиатсияи байнулмилалии рушд 225 млн. доллар маблағ ҷудо мекунад, ки 57 млн. доллараш грант ва боқимонда қарзи имтиёзнок аст. Фонди авруосиёии субот ва рушд ба сифати қарз 40 млн. доллар ҷудо карда, боз Бонки осиёгии сармоягузории зерсохторӣ низ 60 млн. доллар қарз медиҳад. Ҳиссаи ҳукумати Тоҷикистон дар ин лоиҳа 25 млн. долларро ташкил медиҳад.
Марҳилаи аввали лоиҳаи таъмиру навсозии нерӯгоҳи Норак муддати панҷ сол амалӣ мешавад. Барои амалисозии марҳилаи дуюми лоиҳа низ 350 млн. доллар маблағ зарур аст. Пас аз пурра анҷом ёфтани корҳои таъмиру навсозӣ, ҳаҷми истеҳсоли нерӯи барқ дар иншоот то ба 3300 МВт мерасад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
